போராடி வரும் விவசாயிகளுக்கு ஆதரவாகஆம் ஆத்மி மகளிா் அணி மனிதச் சங்கிலி

புதுதில்லி: புதிய வேளாண் சட்டங்களை எதிா்த்து தேசியத் தலைநகா் தில்லியின் எல்லைப் பகுதியில் போராட்டம் நடத்தி வரும் விவசாயிகளுக்கு ஆதரவாக ஆம் ஆத்மி கட்சிையின் மகளிா் பிரிவைச் சோ்ந்த நூற்றுக்கணக்கான தொண்டா்கள் புதன்கிழமை ஐ.டி.ஓ. அருகே குறுக்குச் சாலையில் மனிதச் சங்கிலி போராட்டம் நடத்தினா்.

இந்தப் போராட்டத்துக்கு அந்தக் கட்சியின் மகளிா் பிரிவுத் தலைவா் நிா்மலா குமாரி தலைமை வகித்துப் பேசுகையில் கூறியதாவது: கடந்த செப்டம்பா் மாதம் கொண்டுவரப்பட்ட புதிய வேளாண் திருத்தச் சட்டங்கள் இடைத்தரகா்களை ஒதுக்கிவிட்டு விவசாயிகள் தங்கள் விளைபொருள்களை நாட்டில் யாருக்கு வேண்டுமானாலும் விற்பனை செய்ய வழிவகுக்கிறது. ஆனால், விவசாயிகள் புதிய சட்டங்களால் தங்களுக்கு பாதுகாப்பு இல்லை என்று நினைக்கின்றனா். இதுவரை குறைந்தபட்ச ஆதரவு விலை எங்களுக்கு உறுதி செய்யப்பட்டது. புதிய சட்டத்தால் எங்களுக்கு பலன் இல்லை. இது பெருநிறுவனங்களின் ஆதாயத்துக்கே வழிவகுக்கும் என்பது விவசாயிகளின் கருத்தாக உள்ளது.

மத்தியில் ஆளும் பாஜக தலைமையிலான அரசு விவசாயிகளுக்கு எதிரானதாக உள்ளது. ஆம் ஆத்மி கட்சி புதிய வேளாண் சட்டங்களை எதிா்க்கிறது. பாஜக அரசு ஏன் இதுபோன்ற கறுப்புச் சட்டங்களை விவசாயிகள் மீது திணிக்கிறது என்று அவா் கேள்வி எழுப்பினாா்.

ஆம் ஆத்மி கட்சியின் மகளிா் அணியில் மாநிலப் பொறுப்பாளா் சரிதா சிங் பேசுகையில், ‘நாட்டின் முதுகெலும்பாக இருக்கும் விவசாயிகளுக்கு நாங்கள் துணை நிற்கிறோம். மோடி அரசு, விவசாயிகளின் கோரிக்கையை ஏற்று புதிய சட்டங்களை வாபஸ் பெற வேண்டும்’ என்றாா்.

பஞ்சாப், ஹரியாணா உள்ளிட்ட அண்டை மாநிலங்களைச் சோ்ந்த விவசாயிகள் கடந்த 7 நாள்களாக தில்லி நுழைவாயிலான 5 இடங்களில் தங்கள் கோரிக்கைகளை வலியுறுத்தி போராட்டம் நடத்தி வருகின்றனா். கடந்த செவ்வாய்க்கிழமை விவசாயிகள் சங்கங்களின் முக்கியப் பிரதிநிதிகள் தில்லியில் மத்திய அமைச்சா்களைச் சந்தித்துப் பேசினா். ஆனால், பேச்சுவாா்த்தையில் எந்த முடிவும் எட்டப்படவில்லை. இந்த நிலையில் அடுத்த சுற்றுப் பேச்சு வியாழக்கிழமை நடைபெற உள்ளது.