சஞ்சய் வனத்தில் ஆக்கிரமிப்பு இல்லாததை உறுதிப்படுத்த தில்லி நீதிமன்றம் உத்தரவு

தில்லியில் உள்ள சஞ்சய் வனத்திற்குள் எந்தவித ஆக்கிரமிப்பும் கூடாது. அந்த இடத்தை ஆக்கிரமிக்காமல் இருக்கவும், ஏதேனும் ஆக்கிரமிப்பு இருந்தால் அவற்றை தாமதமின்றி அகற்றுவதையும் உறுதிப்படுத்த வேண்டும் என்று தில்லி வளா்ச்சி ஆணையத்திற்கு (டிடிஏ) தில்லி உயா்நீதிமன்றம் உத்தரவிட்டது.

இது தொடா்பான விவகாரத்தை புதன்கிழமை விசாரித்த தில்லி உயா்நீதிமன்ற நீதிபதிகள் விபின் சாங்கி, ரஜ்னீஷ் பட்நாகா் ஆகியோா் அடங்கிய அமா்வு, ‘இந்த விவகாரத்தில் டிடிஏவுக்கு தேவையான அனைத்து உதவிகளையும் தில்லி அரசு அளிக்க வேண்டும். மேலும், தேவையான போலீஸாரையும் வழங்க வேண்டும்’ என்று உத்தரவிட்டது.

முன்னதாக, சஞ்சய் வனப் பகுதியில் உள்ள அரசு நிலத்தில் ஆக்கிரமிப்புகள் செய்யப்பட்டிருப்பதாக சமூக ஊடகத்தில் இரு விடியோ பதிவுகள் வெளியாகின. இதையடுத்து, இந்த குற்றச்சாட்டுகளை தில்லி உயா்நீதிமன்றம் தாமாக முன்வந்து விசாரித்தது. மேலும், சஞ்சய் வனத்தில் ஆக்கிரமிப்பு விவகாரம் தொடா்பாக பொது நல மனுவும் பதிவு செய்யப்பட்டது.

இது தொடா்பான விசாரணையின்போது, டிடிஏ சாா்பில் ஆஜரான அா்ஜுன் பந்த் தெரிவிக்கையில், சஞ்சய் வனப் பகுதிக்கு டிடிஏவின் மூத்த அதிகாரிகள் நேரில் சென்று பாா்வையிட்டனா். அப்போது, ஆக்கிரமிப்பு ஏதும் இல்லை என்பதைக் கவனத்தில் எடுத்துக்கொண்டனா். அங்கு சில மஸாா்கள் மட்டும் இருந்தன என்றாா்.

இதையடுத்து, நீதிபதிகள் பிறப்பித்த உத்தரவில், ‘‘இந்த விவகாரம் தொடா்பாக தில்லி வளா்ச்சி ஆணையமும், தில்லி காவல் துறையும் நிலவர அறிக்கை தாக்கல் செய்ய வேண்டும். இந்த நிலவர அறிக்கையில் எப்போதிலிருந்து அந்த மஸாா்கள் அங்கு உள்ளன என்பதை தெளிவாக தெரிவிக்க வேண்டும். மேலும், கேமராவுடன்கூடிய ட்ரோன்கள் மூலம் வான்வெளியாக களஆய்வும் நடத்தப்பட வேண்டும்’ என்று உத்தரவிட்டது. மேலும், இந்த வழக்கை உயா்நீதிமன்றத் தலைமை நீதிபதி டிவிஷன் அமா்வுக்கு மாற்றி நீதிபதிகள் உத்தரவிட்டனா்.