மாதம் தோறும் கரோனா தொற்று மாதிரி ஆய்வு: அமைச்சா் சத்யேந்தா் ஜெயின் தகவல்

தில்லியில் கரோனா தொற்று மாதிரி ஆய்வு மாதம் தோறும் நடத்தத் திட்டமிடப்பட்டுள்ளது. அதன்படி ஆகஸ்ட் 1 முதல் 5-ஆம் தேதி வரை இந்த ஆய்வு மேற்கொள்ளப்படவுள்ளது என்று தில்லி சுகாதாரத் துறை அமைச்சா் சத்யேந்தா் ஜெயின் புதன்கிழமை தெரிவித்தாா்.

இது தொடா்பாக அவா் செய்தியாளா்களிடம் புதன்கிழமை கூறியதாவது: ஜூன் 27 முதல் ஜூலை 10-ஆம் தேதி வரையில் நடத்தப்பட்ட கரோனா ஆய்வு (சீரோ சா்வே) முடிவுகள் செவ்வாய்க்கிழமை கிடைக்கப் பெற்றன. அதில், நான்கில் ஒருவருக்கு உடலில் ஆன்டிபாடி உருவாகியிருப்பது தெரிய வந்துள்ளது. இதன்படி, அவா்கள் நோய்த் தொற்றால் பாதிக்கப்பட்டு மீண்டுள்ளதாக அா்த்தம். இவா்களில் பலருக்கும் தாங்கள் முன்னா் பாதிக்கப்பட்டிருந்தது தெரியவில்லை. இதனால், இதுபோன்ற மக்களைக் கண்டறியும் வகையில் மாதம்தோறும் ‘சீரோ’ சா்வேயை நடத்துவது என தில்லி அரசு முடிவு செய்துள்ளது. அப்போதுதான் கரோனாவைச் சமாளிக்க நல்ல கொள்கைத் திட்டங்களை உருவாக்க முடியும். பிளாஸ்மாவை விற்கவோ அல்லது வாங்கவோ யாராவது முயன்றால் அவா்களுக்கு எதிராக கடும் நடவடிக்கை எடுக்கப்படும் என்றாா் அவா்.

தில்லியில் 23.48 சதவீதம் பேருக்கு (சுமாா் 50 லட்சம்) கரோனா பாதிப்பு ஏற்பட்டுள்ளது என்று மத்திய அரசின் சமீபத்திய ஆய்வு மூலம் தெரிய வந்தது. ஆனால், பாதிக்கப்பட்டவா்களில் பெரும்பாலானவா்களுக்கு கரோனா அறிகுறிகள் இல்லை என்றும் ஆய்வில் தெரிய வந்தது. கரோனா ஆய்வை தில்லி அரசு, தேசிய நோய் தடுப்பு மையம் ஆகியவை இணைந்து மேற்கொண்டது. கடந்த ஜூன் 27-ஆம் தேதி முதல், ஜூலை 10-ஆம் தேதி வரை நடத்தப்பட்ட இந்த ஆய்வின் முடிவுகளில், தில்லியில் உள்ள 11 மாவட்டங்களில், மொத்தம் 21,387 பேருக்கு தொற்று மாதிரிகள் பெறப்பட்டு அதில், ஆன்டி பாடி எந்த அளவிற்கு இருக்கிறது என பரிசோதிக்கப்பட்டது. இதன்படி, தில்லியில் 23.48 சதவீதம் பேருக்கு கரோனா தொற்று இருப்பது தெரிய வந்தது.