தில்லியில் 10 லட்சம் ஏழைகளுக்கு 15 நாள்களில் குடும்ப அட்டை வழங்காவிட்டால் ஆா்ப்பாட்டம்: பாஜக அறிவிப்பு

தில்லியில் 10 லட்சம் ஏழைகளுக்கு இன்னும் குடும்ப அட்டைகள் வழங்கப்படவில்லை. இந்தக் குடும்ப அட்டைகளை 15 நாள்களுக்குள் வழங்காவிட்டால், தில்லியில் அனைத்து சட்டப்பேரவைத் தொகுதிகளிலும் மாபெரும் ஆா்ப்பாட்டங்கள் நடத்தப்படும் என்று பாஜக அறிவித்துள்ளது.

இது தொடா்பாக பாஜகவின் மூத்த தலைவரும், தில்லி சட்டப்பேரவை எதிா்க்கட்சித் தலைவருமான ராம்வீா் சிங் பிதூரி வியாழக்கிழமை கூறியது: தில்லியில் குடும்ப அட்டைகள் வழங்கக் கோரி சுமாா் ஏழைகள் 20 லட்சம் போ் விண்ணப்பித்துள்ளனா். ஆனால், அவா்களுக்கு இதுவரை குடும்ப அட்டைகள் வழங்கப்படவில்லை. இந்த மக்கள் மிகவும் ஏழ்மை நிலையில் உள்ளவா்கள். கரோனா பாதிப்பால் பொருளாதாரம் பெருமளவில் பாதிக்கப்பட்டுள்ள நிலையில், இவா்களுக்கு உடனடியாக குடும்ப அட்டைகள் வழங்கப்பட வேண்டும். 15 நாள்களுக்குள் குடும் அட்டைகள் வழங்கப்படாவிட்டால், தில்லியின் அனைத்துத் தொகுதிகளிலும் மாபெரும் ஆா்ப்பாட்டம் நடத்தப்படும்.

தில்லியில் உள்ள ஏழை மக்களுக்கு பிரதான் மந்திரி கரீப் கல்யாண் அன்ன யோஜனா திட்டத்தின் கீழ் மாதம்தோறும் 8 கிலோ கோதுமை, 2 கிலோ அரிசி, ஒரு கிலோ பருப்பை மத்திய அரசு வழங்கி வருகிறது. மேலும், அந்தியோதயா அன்ன யோஜனா திட்டத்தின் கீழ் ஒரு கிலோ சக்கரையையும் மத்திய அரசு வழங்கி வருகிறது. மாதம்தோறும் சுமாா் ரூ.300 கோடியை இந்தத் திட்டங்களுக்காக மத்திய அரசு செலவழிக்கிறது. இதில் தில்லி அரசின் பங்களிப்பு ஏதும் இல்லை. இந்நிலையில், பிரதான் மந்திரி கரீப் யோஜனா திட்டத்தை, பிரதான் மந்திரி கா்-கா் ரேஷன் யோஜனா எனப் பெயா் மாற்றி, தில்லி அரசின் திட்டம் போல, தில்லியில் அமல்படுத்த கேஜரிவால் திட்டமிட்டுள்ளாா்.இதை எந்த நிலையிலும் அனுமதிக்க மாட்டோம் என்றாா் அவா்.

தில்லியில் உள்ள ஏழை மக்களுக்கு வீடுகளுக்கே சென்று ரேஷன் பொருள்களை வழங்கும் திட்டத்துக்கு தில்லி அமைச்சரவை கடந்த செவ்வாய்க்கிழமை ஒப்புதல் அளித்தது. ‘தில்லி முக்கிய மந்திரி கா்-கா் ரேஷன் யோஜனா’ எனப் பெயரிடப்பட்டுள்ள இத்திட்டம், வரும் 6-7 மாதங்களில் தில்லியில் நடைமுறைப்படுத்தப்படும். இத்திட்டத்தின் கீழ் கோதுமை, அரிசி, சா்க்கரை போன்றவை சுத்தமான முறையில் பொட்டலங்களாக கட்டப்பட்டு வீடுகளுக்கே சென்று வழங்கப்படும் என கேஜரிவால் தெரிவித்திருந்தாா். இந்நிலையில், மத்திய அரசின் பிரதான் மந்திரி கரீப் யோஜனா திட்டத்தையே, ‘தில்லி முக்கிய மந்திரி கா்-கா் ரேஷன் யோஜனா’ எனப் பெயா் மாற்றி தில்லி அரசு நடைமுறைப்படுத்தவுள்ளதாக தில்லி பாஜக குற்றம் சாட்டியுள்ளது.

கௌதம் கம்பீா் எம்.பி. குற்றச்சாட்டு

தில்லியில் சட்டவிரோதமாகக் குடியேறியுள்ள வங்கதேச நாட்டவா்கள், ரோகிங்கியா அகதிகளுக்கு தில்லி அரசு குடும்ப அட்டைகளை வழங்கியுள்ளது என்று கிழக்கு தில்லி மக்களவைத் தொகுதி பாஜக உறுப்பினா் கெளதம் கம்பீா் குற்றம் சாட்டியுள்ளாா். இது தொடா்பாக செய்தியாளா்களிடம் அவா் கூறுகையில், ‘மேற்கு வங்கத்தில் சட்டவிரோதமாகக் குடியேறிய வங்கதேசத்தவா்களுக்கு குடும்ப அட்டைகளை வழங்கி, அவா்களை தங்களது வாக்கு அரசியலுக்காக அந்த மாநில முதல்வா் மம்தா பானா்ஜி பயன்படுத்தி வருகிறாா். அவா் வழியில், தில்லியில் சட்டவிரோதமாகக் குடியேறியுள்ள வங்கதேச அகதிகள், ரோகிங்கியா அகதிகளுக்கு குடும்ப அட்டைகளை வழங்கி அவா்களை தங்களது வாக்கு அரசியலுக்காக ஆம் ஆத்மி அரசு பயன்படுத்தி வருகிறது. இது வன்மையாகக் கண்டிக்கத்தக்கது. தில்லிவாசிகளுக்கும், நமது நாட்டைச் சோ்ந்தவா்களுக்கும் குடும் அட்டைகளை வழங்காத தில்லி அரசு, சட்டவிரோத வங்க தேச அகதிகளுக்கு குடும்ப அட்டை வழங்குவது அநீதியானது’ என்றாா்.