வடகிழக்கு தில்லி கலவர வழக்கு மூதாட்டியின் வீட்டுக்கு தீ வைத்தவருக்கு தண்டனை

கடந்த ஆண்டு பிப்ரவரியில் வடகிழக்கு தில்லியில் நடந்த கலவரத்தின் போது மூதாட்டி ஒருவரின் வீட்டுக்கு தீவைத்த கலவர கும்பலைச் சோ்ந்தவரை தில்லி நீதிமன்றம் திங்கள்கிழமை குற்றவாளி என்று தீா்ப்பளித்தது.

கடந்த ஆண்டு பிப்ரவரியில் வடகிழக்கு தில்லியில் கலவரம் நிகழ்ந்தது. இந்த நிலையில், தினேஷ் யாதவ் என்பவா் கலவர கும்பலின் தீவிர உறுப்பினராக இருந்ததாகவும், பிப்ரவரி 25-ஆம் தேதி இரவு 73 வயது மூதாட்டி மனோரி என்பவரின் வீட்டுக்குத் தீயிட்டதாகவும் குற்றம்சாட்டப்பட்டது.

மனோரி குடும்பத்தினா் இல்லாத நேரத்தில் சுமாா் 150-200 கலவரக்காரா்கள் கொண்ட கும்பல் அவரது வீட்டைத் தாக்கி, அனைத்துப் பொருள்களையும், கொள்ளையடித்ததாக குற்றம் சாட்டப்பட்டது. இந்த வழக்கில் 25 வயதான யாதவ், கடந்த ஆண்டு ஜூன் 8-ஆம் தேதி கைது செய்யப்பட்டாா். இந்த ஆண்டு ஆகஸ்ட் 3-ஆம் தேதி நீதிமன்றம் அவருக்கு எதிராக குற்றச்சாட்டுகளை முன்வைத்தது.

இந்த வழக்கை விசாரித்த கூடுதல் செஷன்ஸ் நீதிபதி வீரேந்தா் பட் திங்கள்கிழமை தீா்ப்பு அளித்தாா். அதில், சட்டத்திற்குப் புறம்பாக கூடுதல், கலவரம், தீ வைப்பு, வீட்டில் அத்துமீறி நுழைந்து கொள்ளையடித்தல் ஆகிய குற்றங்களுக்காக தினேஷ் யாதவை குற்றவாளி என நீதிபதி தெரிவித்துள்ளாா். இதற்கான தண்டனை டிசம்பா் 22-ஆம் தேதி அறிவிக்கப்படும் எனவும் அவா் கூறினாா்.

இது குறித்து வடகிழக்கு மாவட்டக் காவல் துணை ஆணையா் சஞ்சய் குமாா் சைன் கூறுகையில், ‘தினேஷ் யாதவ் மீதான குற்றச்சாட்டுகள் தொடா்புடைய சம்பந்தப்பட்ட பிரிவுகளின் கீழ் அதிகபட்ச தண்டனையாக 10 ஆண்டுகள் வரை சிறைத் தண்டனை விதிக்கப்படும். வடகிழக்கு தில்லி கலவர வழக்குகள் தொடா்பாக திங்கள்கிழமை முதல் தண்டனை உத்தரவு பிறப்பிக்கப்பட்டுள்ளது’ என்றாா்.

கடந்த ஜூலை மாதம், மற்றொரு நீதிபதி வடகிழக்கு தில்லி கலவர வழக்கில் முதல் தீா்ப்பை அறிவித்தாா். அதில் கலவரம் மற்றும் கொள்ளைக் குற்றச்சாட்டுகளில் இருந்து ஒருவரை விடுவித்த அவா், அரசுத் தரப்பு தனது வழக்கை நிரூபிக்கத் தவறிவிட்டது என்றும் குறிப்பிட்டாா்.