கடும் பனிமூட்டம்: தில்லியில் காற்றின் தரத்தில் முன்னேற்றம்

புது தில்லி: தலைநகா் தில்லியில் குளிரின் தாக்கம் நீடித்து வரும் நிலையில், புதன்கிழமையும் கடும் பனி மூட்டம் காணப்பட்டது. எனினும், காற்றின் தாக்கம் காரணமாக காற்றின் தரத்தில் மேம்பாடு காணப்பட்டதாக வானிலை ஆய்வு மையத்தினா் தெரிவித்தனா்.

இது குறித்து இந்திய வானிலை ஆய்வு மைய அதிகாரிகள்கூறுகையில், ‘பனி மூடிய மேற்கு இமயமலையில் இருந்து வீசும் வடமேற்கு காற்று காரணமாக குறைந்தபட்ச வெப்பநிலையில் தாக்கம் ஏற்பட்டு வருகிறது. புதன்கிழமை அதிகபசட்ச காற்றின் வேகம் மணிக்கு 15 கிலோமீட்டா் வேகத்தில் இருந்தது என்று தெரிவித்தனா்.

தில்லி நகருக்கான பிரதிநிதித்துவ தரவுகளை வழங்கும் சஃப்தா்ஜங் வானிலை ஆய்வு மையத்தில் திங்கள்கிழமை காலை குறைந்தபட்ச வெப்பநிலை 7.8 டிகிரி செல்சியஸாக பதிவாகியது.

காற்றின் தரம்: தில்லியில் ஒட்டுமொத்தக் காற்றின் தரக் குறியீடு செவ்வாய்க்கிழமை கடுமைப் பிரிவில் இருந்த நிலையில், புதன்கிழமை மோசம் பிரிவுக்கு மேம்பட்டது. காற்றின் வேகம் காரணமாக இந்த முன்னேற்றம் காணப்பட்டது. 24 மணிநேர சராசரி காற்றின் தரக் குறியீடு 283 புள்ளிகளாக இருந்தது. செவ்வாய்க்கிழமை இது

404 ஆக பதிவாகி இருந்தது.

தேசியத் தலைநகா் வலயப் பகுதியில் உள்ள காஜியாபாத், நொய்டா, கிரேட்டா் நொய்டா மற்றும் பரீதாபாத் பகுதியில் காற்றின் தரம் மிகவும் மோசம் பிரிவிலும், குருகிராம் பகுதியில் மோசம் பிரிவிலும் பதிவானது.

24 மணி நேர சராசரி காற்றின் தரக் குறியீடு புதன்கிழமை மாலை 4 மணியளவில் காஜியாபாதில் 336, கிரேட்டா் நொய்டாவில் 321, நொய்டாவில் 310, பரீதாபாதில் 201, குருகிராமில் 207 என பதிவானது.

செவ்வாய்க்கிழமை இந்த தரமானது காஜியாபாதில் 436, கிரேட்டா் நொய்டாவில் 434, நொய்டாவில் 432, பரீதாபாதில் 416, குருகிராமில் 366 ஆக பதிவாகி இருந்தது குறிப்பிடத்தக்கது.