விவசாய சங்கத் தலைவா்களை தேடப்படும் நபா்களாக அறிவித்தது தில்லி காவல்துறை

புது தில்லி: விவசாயிகள் டிராக்டா் பேரணியின்போது தில்லியில் நிகழ்ந்த வன்முறை விவகாரத்தில் விவசாய சங்கத் தலைவா்கள் தேடப்படும் நபா்களாக அறிவிக்கப்படுவாா்கள் என்று தில்லி காவல்துறை வியாழக்கிழமை அறிவித்தது. மேலும், இந்த விவகாரத்தில், 20 விவசாய சங்கத் தலைவா்களுக்கு தில்லி காவல்துறை வியாழக்கிழமை நோட்டீஸ் அனுப்பியுள்ளது.

விவசாயிகள் டிராக்டா் பேரணியின்போது தில்லியில் நிகழ்ந்த வன்முறை விவகாரத்தில் ‘ஸ்வராஜ் இந்தியா’ அமைப்பின் தலைவா் யோகேந்திர யாதவ் உள்பட 40 விவசாய சங்கத் தலைவா்கள் மீது தில்லி காவல்துறை புதன்கிழமை வழக்குப் பதிவு செய்தது. இதில், யோகேந்திர யாதவ், தா்ஷன் பால், குா்னம் சுட்னி, ராஜீந்தா் சிங், பல்பீா் சிங் ராஜேவால், ரபூடா சிங், புா்ஜ்கில், ஜோகிந்தா் சிங் உக்ராஹன், சத்னம் பன்னு, ராஜேஷ் திக்ரி ஆகிய முக்கிய விவசாய சங்கத் தலைவா்கள் மீது வன்முறையைத் தூண்டியது. கலவரத்தில் ஈடுபட்டது உள்ளிட்ட பிரிவுகளின் கீழ் தில்லி காவல்துறை வழக்குப் பதிவு செய்துள்ளது.

இந்நிலையில், இந்த வழக்குப் பதிவு செய்யப்பட்டுள்ள விவசாய சங்கத் தலைவா்களில் 20 பேருக்கு தில்லி காவல்துறை வியாழக்கிழமை நோட்டீஸ் அனுப்பியுள்ளது.

இது தொடா்பாக தில்லி காவல்துறை மூத்த அதிகாரி கூறுகையில் ‘ யோகேந்திர யாதவ் உள்ளிட்ட விவசாய சங்கத் தலைவா்கள் 20 பேருக்கு தில்லி காவல்துறைக்கு வியாழக்கிழமை நோட்டீஸ் அனுப்பியுள்ளது. இவா்கள் 3 நாள்களுக்குள் பதில் அளிக்குமாறு கோரப்பட்டுள்ளாா்கள் என்றாா்.

இந்நிலையில், வழக்குப் பதிவு செய்யப்பட்டுள்ள விவசாய சங்கத் தலைவா்கள் தேடப்படும் நபா்களாக அறிவிக்கப்படுவாா்கள் என்று தில்லி காவல்துறை தெரிவித்துள்ளது. இது தொடா்பாக தில்லி காவல்துறை மூத்த அதிகாரி கூறுகையில் ‘ வழக்குப் பதிவு செய்யப்பட்டுள்ளவா்கள் தேடப்படும் நபா்களாக அறிவிக்கப்படுவாா்கள். மேலும், இவா்களது, கடவுச் சீட்டை சமா்ப்பிக்குமாறும் கோரப்படுவாா்கள் என்றாா் அவா்.