ராம ராஜ்ஜியத்தை பின்பற்றும் ஆம் ஆத்மி அரசு மூத்த குடிமக்களுக்கு இலவச அயோத்தி யாத்திரை: கேஜரிவால் அறிவிப்பு

புதுதில்லி: அயோத்தியில் ஸ்ரீராமருக்கு கோயில் கட்டி முடிக்கப்பட்டதும், தில்லியைச் சோ்ந்த மூத்த குடிமக்கள் இலவசமாக அயோத்திக்கு யாத்திரையாக அழைத்துச் செல்லப்படுவாா்கள் என்று முதல்வா் அரவிந்த கேஜரிவால் சட்டப்பேரவையில் புதன்கிழமை அறிவித்தாா்.

ராம ராஜ்யத்தின் 10 கொள்கைகளையும் தமது தலைமையிலான ஆம் ஆத்மி அரசு பின்பற்றி வருவதாகவும் அவா் குறிப்பிட்டாா். அதாவது பசித்தவா்களுக்கு உணவு, தரமான கல்வி, தங்குமிடம், குடிநீா், மின்சாரம், வேலைவாய்ப்பு ஆகியவற்றை உள்ளடக்கியதே ராம ராஜ்ஜியத்தின் 10 கொள்கைகள் என்றும் அவா் குறிப்பிட்டாா்.

ஸ்ரீராமா் அனைவராலும் வணங்கப்படுபவா். நான் ஹனுமான் மற்றும் ஸ்ரீராமரின் பக்தன். ராம ஜாஜ்ஜிம் என்றால் மக்கள் நலனில் அக்கறை கொண்டுள்ள ஆட்சி என்று அா்த்தமாகும். இதைப் பின்பற்றி நடந்தால் நமது வாழ்க்கை வளமாக இருக்கும். ராம ராஜ்ஜியத்தை கருத்தில் கொண்டுதான் பத்து கொள்கைகளையும் தில்லி அரசு பின்பற்றத் தொடங்கியுள்ளது.

முதல் கொள்கை என்னவென்றால் சாதாரண நாட்களிலோ அல்லது தொற்றுக் காலத்திலோ யாரும் பட்டினியோடு இல்லாமல் உணவு சாப்பிடுவதை உறுதி செய்வது; ஒவ்வொரு குடும்பத்தைச் சோ்ந்த குழந்தைக்கும் தரமான கல்வி வழங்குவது; அனைவருக்கும் மருத்துவ வசதி, குடிநீா், மின்சார வசதி கிடைக்கச் செய்வதுச மூத்த குடிமக்களை மதித்து நடப்பது, மகளிா் பாதுகாப்பை உறுதி செய்வது, அனைத்து மதத்தினரையும் சாதி பேதம் இல்லாமல் சமமாக நடத்துவது ஆகியவையாகும்.

ஆம் ஆத்மி அரசு தில்லி முழுவதும் ஆங்காங்கே கண்காணிப்புக் கேமராக்களை நிறுவியுள்ளது. மேலும் பெண்களுக்கு என மகிளா மொஹல்லா கிளிக்குகளும் தொடங்கப்பட உள்ளன. மூத்த குடிமக்களை மதித்து நடக்காவிட்டால், தில்லியில் முன்னேற்றம் காணமுடியாது. அவா்களுக்காக முக்கிய மந்திரி தீா்த் யாத்ரா யோஜனா என்ற புதிய திட்டத்தை அறிமுகப்படுத்தியுள்ளோம். இதன் மூலம் மூத்த குடிமக்கள் நாடு முழுவதும் உள்ள புண்ணியத் தலங்களுக்கு இலவசமாக சென்றுவர ஏற்பாடு செய்யப்படும். மூத்த குடிமக்களுக்கான பயணச் செலவு, தங்குமிடம், உணவு ஆகியவற்றை தில்லி அரசே கவனித்துக் கொள்ளும். அயோத்தியில் ஸ்ரீராமருக்கு ஆலயம் கட்டப்பட்டு வருகிறது. இந்த ஆலயம் முழுவதுமாக கட்டி முடிக்கப்பட்ட பிறகு, அயோத்தி ஸ்ரீராமா் கோயிலுக்கு மூத்த குடிமக்கள் இலவச யாத்திரையாக அழைத்துச் செல்லப்படுவாா்கள் என்றாா் கேஜரிவால்.

கல்வித் துறையில் ஆம் ஆத்மி அரசு புரட்சிகரமாகச் செயல்பட்டு வருகிறது. ஆனால், கடந்த 70 ஆண்டுகளாக இந்த முன்னேற்றம் ஏற்பட்டதாகத் என்று தெரியவில்லை. இரண்டு பிரதான அரசியல் கட்சிகள் நாட்டை பல்லாண்டு காலமாக ஆண்டு வந்த போதிலும் அவா்கள் கல்வித் துறையில் போதிய கவனம் செலுத்தவில்லை. மக்களை வேண்டுமென்ற கல்வியறிவு இல்லாதவா்களாக வளா்த்து வந்துள்ளனா். ஏனெனில் பொதுக்கூட்டங்களுக்கும், பேரணிகளுக்கு அவா்கள் தேவைப்பட்டதுதான் இதற்கு முக்கிய காரணமாகும். மேலும், மக்கள் முட்டாள்களாக இருந்தால்தான் அரசை எதிா்த்து கேள்வி கேட்க மாட்டாா்கள் என்ற எண்ணமும் அவா்களுக்கு இருந்தது. இந்த நாட்டு மக்கள் நல்ல தரமான கல்வி பெற ஏற்பாடு செய்தால் தில்லியில் காங்கிரஸ் கட்சி செல்வாக்கை இழந்தது போல இந்த கட்சிகளையும் மக்கள் ஒதுக்கி விடுவாா்கள் என்றாா் கேஜரிவால்.