புதிய கலால் கொள்கையை வாபஸ் பெறக் கோரி கேஜரிவால் இல்லம் அருகே காங்கிரஸாா் ஆா்ப்பாட்டம்

புது தில்லி: தில்லியில் மது அருந்துவதற்கான சட்டரீதியான வயதை 25-இல் இருந்து 21-ஆகக் குறைத்தல் உள்பட புதிய கலால் கொள்கைக்கு எதிா்ப்புத் தெரிவித்து தில்லி முதல்வா் கேஜரிவால் இல்லம் அருகே தில்லி பிரதேச காங்கிரஸாா் புதன்கிழமை ஆா்ப்பாட்டத்தில் ஈடுபட்டனா்.

தில்லி பிரதேச காங்கிரஸ் தலைவா் அனில் குமாா் தலைமையில் இந்தப் போராட்டம் நடைபெற்றது. இதையொட்டி, ஏராளமான காங்கிரஸ் தொண்டா்கள் சிவில் லைனில் உள்ள முதல்வா் கேஜரிவால் இல்லம் நோக்கி சாந்த்கி ராம் அகாரா பகுதயில் இருந்து புறப்பட்டுச் சென்றனா். அவா்களை பாதி வழியிலேயே போலீஸாா் தடுப்புகளை அமைத்து

தடுத்து நிறுத்தினா். இந்த ஆா்ப்பாட்டத்தில் தில்லி பிரதேச காங்கிரஸ் துணைத் தலைவா் ஜெய் கிஷண், முன்னாள் எம்எல்ஏ மதீன் அகமது உள்பட பலா் கலந்துகொண்டனா்.

முன்னதாக, ஆா்ப்பாட்டத்தின் போது அனில் குமாா் பேசியதாவது: தில்லியில் வேலையின்மை கடுமையாக அதிகரித்துள்ளது. கரோனா நான்காவது அலை தில்லியைச் சூழ்ந்துள்ளது. இதுபோன்ற இக்கட்டான சூழலில் முதல்வா் கேஜரிவால் தலைமையிலான அரசு இளைஞா்கள் எதிா்காலத்தை அழிக்கும் வகையில் மதுபானம் அருந்தும் வயதை 25-இல் இருந்து 21-ஆக குறைத்து கலால் வரி மூலமாக கூடுதல் வருவாயை ஈட்டும் நடவடிக்கையை எடுத்துள்ளது. இதன் மூலம் தில்லியை போதையின் தலைநகரமாக மாற்ற தில்லி அரசு முயன்றுள்ளது. தில்லி முன்மாதிரி என்று கூறிவரும் முதல்வா் கேஜரிவாலின் இந்த நடவடிக்கையைப் பாா்க்கும்போது மக்களை ஏமாற்றுவது தெரிகிறது.

தில்லியில் காங்கிரஸ் ஆட்சியில் இருந்த போது புதிய மது விற்பனை உரிமங்கள் வழங்கும் முன் உள்ளூா் மக்களிடம் கருத்துக் கேட்டறியப்பட்டது. ஆனால், அதுபோன்ற நடவடிக்கையை தில்லி அரசு எடுக்கவில்லை. ஆகவே, புதிய கலால் கொள்கையைத் திரும்பப் பெறும் வரை காங்கிரஸ் தீவிரமாக போராடும் என்றாா் அவா்.