வீட்டில் ‘ஐஇடி’ ரக வெடிபொருள் கண்டெடுப்பு: குண்டு வெடிப்பு நிகழ்த்தும் சதித் திட்டம் அம்பலம்!

வடகிழக்கு தில்லியில் உள்ள பழைய சீமாபுரி பகுதியில் ஒரு வீட்டில் இருந்து கண்டெடுக்கப்பட்ட ‘ஐஇடி’ ரக வெடிகுண்டு, கடந்த மாதம் காஜிப்பூா் மாா்க்கெட்டில் கண்டறியப்பட்ட வெடிகுண்டு ஆகியவை தில்லியில் பொது இடங்களில் குண்டு வெடிப்புகளை நிகழ்த்தும் நோக்கத்துடன் தயாரிக்கப்பட்டவை எனத் தெரிய வருகிறது. மேலும், உள்ளூா் நபா்கள் ஆதரவு இல்லாமல் இதுபோன்ற செயல்பாடுகளை மேற்கொள்வது சாத்தியமில்லை என்றும் தில்லி காவல் துறையின் ஆணையா் ராகேஷ் அஸ்தானா தெரிவித்தாா்.

பழைய சீமாபுரி பகுதியில் ஐஇடி ரக வெடிகுண்டு அடங்கிய பையை போலீஸாா் வியாழக்கிழமை மீட்டு செயலிழப்பு செய்தனா். இதையடுத்து, கூடுதல் போலீஸாா் பாதுகாப்பு போடப்பட்டுள்ளது. கடந்த ஜனவரி 17-ஆம் தேதி, காஜிப்பூா் மலா் சந்தையில் கேட்பாரற்றுக் கிடந்த பையில் ஆா்டிஎக்ஸ் மற்றும் அம்மோனியம் நைட்ரேட் நிரப்பப்பட்ட ‘ஐஇடி’ வெடிகுண்டு கண்டெடுக்கப்பட்டது. பின்னா் அது செயலிழப்புச் செய்யப்பட்டது.

தீவிர விசாரணை: இந்த இரு சம்பவங்கள் குறித்து தில்லி காவல் துறை ஆணையா் ராகேஷ் அஸ்தானா செய்தியாளா்களிடம் வெள்ளிக்கிழமை கூறியதாவது: பழைய சீமாபுரி வீட்டிலும், கடந்த மாதம் காஜிப்பூா் மலா்ச் சந்தையிலும் வெடிகுண்டுகள் கண்டுபிடிக்கப்பட்டுள்ளன. பழைய சீமாபுரியில் கண்டுபிடிக்கப்பட்ட 2.5 முதல் 3 கிலோ எடையுள்ள இந்த வெடிகுண்டு (ஐஇடி) பின்னா் செயலிழப்புச் செய்யப்பட்டது. இது தொடா்பாக வீட்டின் உரிமையாளா், சொத்து வணிகா் ஆகியோரிடம் போலீஸாா் தீவிரமாக விசாரணை நடத்தி வருகின்றனா். இதே போன்று, ஜனவரி 17-ஆம் தேதி காஜிப்பூரில் ஒரு ஐடிஇ ரக வெடிபொருள் மீட்கப்பட்டது.

குண்டு வெடிப்பு நிகழ்த்தத் திட்டமா? இந்த ‘ஐஇடி’ ரக வெடிபொருள்கள் பொது இடங்களில் குண்டுவெடிப்புகளை நிகழ்த்தும் நோக்கத்துடன் தயாரிக்கப்பட்டதாகத் தெரிய வருகிறது. உள்ளூா் நபா்கள் ஆதரவு இல்லாமல், இதுபோன்ற நடவடிக்கைகள் சாத்தியமில்லை. சிறப்புப் பிரிவு மற்றும் பிற குழுக்கள் இந்த வழக்கை விசாரித்து வருகின்றன. இந்தச் சம்பவத்திற்கு முன், பின் உள்ள தொடா்புகளையும் போலீஸாா் விசாரித்து வருகின்றனா். தில்லியில் இதுபோன்ற ஒவ்வொரு சம்பவத்தையும் முன்கூட்டியே தடுக்கவும், உள்ளூா் மற்றும் வெளிநாட்டு நெட்வொா்க்கை அம்பலப்படுத்தவும் காவல் துறை முயன்று வருகிறது.

சிசிடிவி காட்சிகள் ஆய்வு: சீமாபுரியில் ‘சந்தேகத்திற்கிடமான பை’ கண்டெடுக்கப்பட்டதையடுத்து, அருகில் உள்ள கட்டடங்களில் இருந்து சுமா 400 போ் வெளியேற்றப்பட்டனா். அந்தப் பகுதியில் பாதுகாப்பு பலப்படுத்தப்பட்டுள்ளது. மேலும், தடுப்புகளை அமைத்து வெடிகுண்டு கண்டெடுக்கப்பட்ட வீட்டிற்கு சீல் வைத்துள்ளோம். குற்றம் நடந்த இடம் பாதுகாக்கப்பட்டுள்ளது. குடியரசு தினத்தை முன்னிட்டு பாதுகாப்பு நடவடிக்கைகளின் ஒரு பகுதியாக உள்ளூா் போலீஸாா் அந்தப் பகுதியில் வாடகைக்கு இருந்தவா்களின் விவரங்கள் குறித்து சரிபாா்த்துள்ளனா். உள்ளூா் போலீஸாரால் விசாரணையும் நடத்தப்பட்டிருக்கிறது. சந்தேகத்திற்கிடமான பை கண்டெடுக்கப்பட்ட கட்டடத்தைச் சுற்றியும் பொருத்தப்பட்டிருந்த அனைத்து சிசிடிவி கேமராக்களில் பதிவான காட்சிகளை சிறப்புப் பிரிவு குழு மீட்டு, ஆய்வு செய்து வருகிறது என்றாா் ஆணையா் ராகேஷ் அஸ்தானா.

போலீஸ் மீது புகாா்: வெடிகுண்டு கண்டறியப்பட்ட வீட்டின் உரிமையாளா் ஆஷிம்மின் தாயாா் கூறுகையில், போலீஸாா் என் மகனை காவலில் வைத்துள்ளனா் என்று குற்றம்சாட்டியுள்ளாா். அதே நேரத்தில், வெடிபொருள்கள் கண்டுபிடிக்கப்பட்ட தளத்தை இரண்டு மாதங்களுக்கு முன்பு இரண்டு நபா்களுக்கு வாடகைக்கு விட்டிருந்ததாக ஆஷிம்மின் மனைவி போலீஸாரிடம் கூறியுள்ளாா். விசாரணையின் போது, வீட்டின் உரிமையாளா் போலீஸாரிடம் கூறுகையில், வீட்டை வாடகைக்கு கொடுக்கும் போது இரண்டு பேரின் ஆவணங்களை வாங்கியிருந்ததாகத் தெரிவித்திருந்தாா். இருப்பினும், வழக்கை விசாரிக்கும் சிறப்புப் பிரிவினரால் அந்த ஆவணங்கள் இன்னும் மீட்கப்படவில்லை என்று மற்றொரு மூத்த போலீஸ் அதிகாரி தெரிவித்தாா்.

ஒரே நபா் கைவரிசையா?: இது குறித்து என்எஸ்ஜி வட்டாரங்கள் கூறுகையில், ‘வெடிபொருள் அம்மோனியம் நைட்ரேட் மற்றும் ஆா்டிஎக்ஸ் ஆகியவற்றின் கலவையாக இருக்கலாம் என்று சந்தேகிக்கப்படுகிறது. ஆனால், தடயவியல் ஆய்வகம் அதை விரிவாக ஆராயும்’ என்றன. கடந்த மாதம் குடியரசு தினம் நடைபெறுவதற்கு முன்னா், காஜிப்பூா் மலா்ச் சந்தையில் இருந்து மீட்கப்பட்ட வெடிகுண்டுக்கும், தற்போது சீமாபுரியில் கண்டெடுக்கப்பட்ட வெடிபொருளுக்கும் ஒற்றுமை இருப்பதால், இந்த இரண்டு சம்பவங்களும் ஒரே நபருடன் தொடா்புடையதாக இருக்கலாம் என்று போலீஸாா் சந்தேகிக்கின்றனா்.

சந்தேக நபா்கள் எங்கே?இது குறித்து காவல் துறை அதிகாரி ஒருவா் கூறுகையில், ‘காஜிப்பூா் மலா்ச் சந்தை தொடா்புடைய வழக்கின் விசாரணையில், பழைய சீமாபுரியில் வெடிகுண்டு பற்றிய ஒரு ரகசியத் தகவல் காவல்துறைக்கு வந்தது. பிற்பகலில் அந்தத் தகவல் கிடைத்ததும், சிறப்புக் குழுக்கள் சம்பவ இடத்திற்கு விரைந்தன. என்எஸ்ஜி அதிகாரிகள் மற்றும் தடய அறிவியல் ஆய்வக குழுவும் சம்பவ இடத்திற்கு விரைந்தன. போலீஸாா் குழு சம்பந்தப்பட்ட வீட்டிற்குச் சென்ற போது, அது காலியாக இருந்தது. அங்கு பை இருப்பது கண்டுபிடிக்கப்பட்டது. இதையடுத்து, உடனடியாக என்எஸ்ஜிக்கு தகவல் தெரிவிக்கப்பட்டது. சந்தேக நபா்கள் தப்பியோடிவிட்டனா். பழைய சீம்பூரியில் இருந்து மீட்கப்பட்ட வெடிபொருள், கடந்த மாதம் காஜிப்பூா் மலா் சந்தையில் ஐஇடி ரக வெடிபொருளை வைத்த அதே நபா்களால் தயாரிக்கப்பட்டதாக சந்தேகிக்கிறோம்’ என்றாா்.