அதிமுக பொதுக்குழு விவகாரம்: ஓபிஎஸ் தரப்பில் உச்சநீதிமன்றத்தில் கேவியட் மனு தாக்கல்

புது தில்லி: அதிமுக பொதுக் குழு விவகாரம் தொடா்பாக சென்னை உயா்நீதிமன்ற டிவிஷன் பெஞ்ச் உத்தரவு பிறப்பித்திருந்த நிலையில், உச்சநீதிமன்றத்தில் ஓ.பன்னீா்செல்வம் தரப்பில் கேவியட் மனு தாக்கல் செய்யப்பட்டுள்ளது.

அதிமுக பொதுக்குழு கூட்டம் ஜூன் 23-ஆம் தேதி சென்னையில் நடைபெற்றது. இதற்கு முன்னதாக, பொதுக்குழு தீா்மானம் முன்கூட்டி பொதுக்குழு உறுப்பினா்களுக்கு வழங்கவில்லை என்றும், ஒப்புதல் அளிக்கப்பட்ட தீா்மானத்தைத் தவிர புதிய தீா்மானம் நிறைவேற்ற தடை விதிக்க வேண்டும் என்றும் கேட்டு பொதுக்குழு உறுப்பினா் சண்முகம் என்பவா் சென்னை உயா்நீதிமன்றத்தில் வழக்குத் தொடா்ந்தாா். இந்த வழக்கை விசாரித்த நீதிபதி கிருஷ்ணன் ராமசாமி, அதிமுக பொதுக்குழு கூட்டம் நடத்த தடையில்லை என்றும், திட்டமிட்டபடி பொதுக்குழு கூட்டத்தை நடத்தலாம் என்றும் அனுமதி அளித்து உத்தரவிட்டாா்.

இந்த உத்தரவை எதிா்த்து எதிா்த்தரப்பினரின் மேல்முறையீட்டு வழக்கை விசாரித்த சென்னை உயா்நீதிமன்ற நீதிபதி துரைச்சாமி தலைமையிலான டிவிஷன் பெஞ்ச், பொதுக்குழுவை நடத்தலாம் என்றும், ஆனால், ஏற்கெனவே ஒப்புதல் அளித்த 23 தீா்மானம் தவிர பிற எந்தத் தீா்மானமும் நிறைவேற்றக் கூடாது என உத்தரவிட்டது.

இந்த நிலையில், சென்னை உயா்நீதிமன்றத்தின் டிவிஷன் பெஞ்ச் உத்தரவுக்கு எதிராக எந்த தரப்பிலும் மேல்முறையீடு செய்தால், தங்கள் தரப்பு வாதங்களை கேட்காமல் எந்த உத்தரவும் பிறப்பிக்கக் கூடாது எனக் கோரி ஒ.பன்னீா்செல்வம் சாா்பில் உச்சநீதிமன்றத்தில் கேவியட் மனு திங்கள்கிழமை தாக்கல் செய்யப்பட்டுள்ளது. ஒ.பி.எஸ். தரப்பில் வழக்குரைஞா் கெளதம் சிவ்சங்கா் இந்த கேவியட் மனுவைத் தாக்கல் செய்துள்ளாா்.