தமிழகத்தில் 100 இடங்களில் ஆயுஷ் நலவாழ்வு மையங்கள்: தில்லியில் அமைச்சா் மா.சுப்பிரமணியன் தகவல்

தமிழகத்தில் 100 இடங்களில் சித்த மருத்துவம் தொடா்பான ஆயுஷ் நலவாழ்வு மையங்கள் அமைக்க மத்திய ஆயுஷ் அமைச்சகம் அனுமதி வழங்கியுள்ளதாக தமிழக மருத்துவம் மற்றும் மக்கள் நல்வாழ்வுத் துறை அமைச்சா் மா.சுப்பிரமணியன் தில்லியில் தெரிவித்தாா்.

தமிழகத்தின் பல்வேறு கோரிக்கைகளை வலியுறுத்துவதற்காக மத்திய சுகாதாரம், ஆயுஷ் துறை அமைச்சா்களை சந்திக்க அவா் ஞாயிற்றுக்கிழமை இரவு தில்லி வந்தாா்.

இதைத் தொடா்ந்து, மத்திய ஆயுஷ் துறை அமைச்சா் சா்வானந்த சோனோவாலை அவரது இல்லத்தில் செவ்வாய்க்கிழமை சந்தித்தாா். மத்திய சுகாதாரம் குடும்ப நலத் துறை அமைச்சா் மன்சுக் மாண்டவியா அவரது தனிப்பட்ட காரணங்களால் தில்லி திரும்பாத நிலையில் மாண்டவியா அறிவுறுத்தலின் பேரில் தமிழக அமைச்சா் சுப்பிரமணியன் மத்திய சுகாதாரத்துறை செயலா் ராஜேஷ்பூஷனை சந்தித்தாா். இந்த இரு சந்திப்புகளிலும் தமிழகத்தின் பல்வேறு கோரிக்கைகள் குறித்து ஆலோசனை நடத்தி எடுக்கப்பட்ட முடிவுகள் குறித்து பின்னா் அமைச்சா் சுப்பிரமணியன் செய்தியாளா்களிடம் விளக்கினாா்.

அப்போது அவா் கூறியதாவது: மத்திய ஆயுஷ் துறை அமைச்சா் சா்வானந்த சோனோவாலை சந்தித்து சித்தாவிற்கு இந்தியாவில் மிகப்பெரிய ஆய்வு நிறுவனம் இல்லை என்றும், இதனால் எய்ம்ஸ் நிறுவனத்தைப் போன்று அகில இந்திய சித்த மருத்துவ நிறுவனம் ஒன்றை தமிழகத்தில் தொடங்க கோரிக்கை வைக்கப்பட்டது. அகில இந்திய சித்த மருத்துவ நிறுவனம் உருவாகும்பட்சத்தில் சித்த மருத்துவத்தில் மேலும் பல ஆராய்ச்சிகள் நடைபெறும். இது எய்ம்ஸ் மாதிரியே அமையும் வகையில் இருக்க மத்திய அமைச்சரிடம் வலியுறுத்தியுள்ளோம். அவரும் இதை ஏற்றுக் கொண்டு, இந்தக் கொள்கை விவகாரத்தில் கலந்து பேசி அறிவிப்பதாகக் கூறியுள்ளாா்.

மதுரை மாவட்டம், திருமங்கலத்தில் சிதிலமடைந்து வரும் ஹோமியோபதி மருத்துவக் கல்லூரியை வேறு இடத்திற்கு மாற்றி மறு கட்டமைப்பு மேற்கொள்ள நிதி ஒதுக்குமாறு கேட்டுக் கொள்ளப்பட்டது. மேலும், தமிழக அரசின் கோரிக்கையை ஏற்றும் 100 இடங்களில் சித்த மருத்துவ ஆயுஷ் நலவாழ்வு மையங்கள் அமைக்க மத்திய ஆயுஷ் அமைச்சா் அனுமதியளித்துள்ளாா். இந்த மையங்கள் தலா ரூ. 12.89 லட்சத்தில் விரைவில் அமைக்கப்படவுள்ளன. நாமக்கல் மாவட்டத்தில் 50 படுக்கைகள் கொண்ட சித்த மருத்துவமனை தொடங்குவதற்கான நிதியுதவி கிடைத்துள்ளது. இது விரைவில் தொடங்கப்படவுள்ளது. பின்னா், இங்கு சித்த மருத்துவக் கல்லூரியும் தொடங்கப்படும்.

கடந்த நிதிநிலை அறிக்கையில் இந்து அறநிலையத் துறை சாா்பில் பழனியில் சித்த மருத்துவக் கல்லூரி அமைக்கப்படும் என அறிவிக்கப்பட்டது. இதற்கான அனுமதி பெறப்பட்டுள்ளது. மிக விரைவில் மருத்துவக் கல்லூரி அடிக்கல் நாட்டுவதற்கு மத்திய அமைச்சரும் வர சம்மதம் தெரிவித்துள்ளாா். மேலும், மத்திய சுகாதாரத் துறைத் செயலா் ராஜேஷ் பூஷனுடனான சந்திப்பின் போது, பல கோரிக்கைகள் முன்வைக்கப்பட்டன. மதுரை தோப்பூரில் எய்ம்ஸ் மருத்துவமனையை விரைவில் அமைக்க நடவடிக்கை எடுக்க கோரப்பட்டது. இதற்கு நிதியுதவி அளிக்கும் ஜப்பான் நிறுவனத்துடன் புதன்கிழமை (செப்டம்பா் 7) இறுதி முடிவு எடுக்கப்படவுள்ளதாக அவா் தெரிவித்தாா்.

தமிழகத்தில் பெரம்பலூா், திருப்பத்தூா், ராணிப்பேட்டை, தென்காசி, காஞ்சிபுரம் மயிலாடுதுறை ஆகிய 6 மாவட்டங்களில் மருத்துவக் கல்லூரி தொடங்குவதற்கு அனுமதி கோரப்பட்டது. மத்திய அரசின் புதிய திட்டங்களுக்கான வரையறைகள் வரும் போது, அதில் இந்த கோரிக்கைகள் பரிசீலிக்கப்படும் என மத்திய சுகாதாரச் செயலா் உறுதியளித்துள்ளாா். மேலும், மாவட்டந்தோறும் செவிலியா் கல்லூரி, உக்ரைனில் மருத்துவம் படித்த 1,890 மாணவா்கள் தமிழகம் திரும்பியுள்ளது உள்ளிட்ட விவகாரங்கள் குறித்தும் பேசப்பட்டது. தேசிய நலவாழ்வு குழுமம் (என்ஹெச்எம்), நிகழாண்டிற்கான சுமாா் ரூ. 205 கோடியை ஒதுக்கீடு செய்ய கோரப்பட்டுள்ளது. இந்த நிதியை ஒரிரு நாளில் விடுவிப்பதாக அவா் கூறியுள்ளாா் என்றாா் அமைச்சா் சுப்பிரமணியன்.