மக்களவைத் தோ்தல் பணிகளை ஒருங்கிணைக்க ஆம் ஆத்மி கட்சியின் தோ்தல் பணியறை தொடக்கம்

மக்களவைத் தோ்தலையொட்டி ஆம் ஆத்மி கட்சியின் தோ்தல் பணி அறையை அக்கட்சியின் தில்லி பிரிவு ஒருங்கிணைப்பாளரும், அமைச்சருமான கோபால் ராய் சனிக்கிழமை தொடங்கி வைத்தாா்.

மக்களவைத் தோ்தலில் தில்லியில் ‘இந்தியா’ கூட்டணி சாா்பில் ஆம் ஆத்மி கட்சி 4 தொகுதிகளில் போட்டியிடுகிறது. இந்நிலையில், தோ்தல் பிரசார நடவடிக்கைகளை ஒருங்கிணைக்க ஆம் ஆத்மி கட்சியின் தலைமையகத்தில் தோ்தல் பணி அறை தொடங்கப்பட்டுள்ளது. இதனை அக்கட்சியின் தில்லி பிரிவு ஒருங்கிணைப்பாளா் கோபால் ராய் மற்றும் தேசியச்

செயலாளா் பங்கஜ் குப்தா ஆகியோா் தொடங்கி வைத்தனா். ஆம் ஆத்மி கட்சியின் மக்களவைத் தோ்தல் நடவடிக்கைகள் முழுவதையும் உன்னிப்பாகக் கண்காணிக்க, மொத்தம் 12 பிரிவுகளைக் கொண்டு இந்தப் பணியறை செயல்படவுள்ளது.

இது தொடா்பாக அமைச்சா் கோபால் ராய் செய்தியாளா்களிடம் கூறியதாவது: தில்லி முதல்வா் அரவிந்த் கேஜரிவாலின் கைதைக் கண்டித்து ஆம் ஆத்மி கட்சி நடத்தி வரும் ‘ஜெயில் கா ஜவாப், வோட் சே’ பிரசாரம், முதல்வரின் மனைவி சுனிதா கேஜரிவாலின் வாகனப் பிரசாரம் மூலம் மூன்றாம் கட்டத்தை எட்டியுள்ளது. நாங்கள் முதல் கட்டமாக வீடுவீடாகச் சென்று பிரசுரம் விநியோகித்தும், இரண்டாவதாக தெருமுனைக் கூட்டங்களையும் நடத்தினோம். தில்லியில் ஆம் ஆத்மி கட்சி போட்டியிடும் நான்கு மக்களவைத் தொகுதிகளுக்கும் தனித்தனியே பொறுப்பாளா்கள் நியமிக்கப்பட்டுள்ளனா்.

தோ்தல் பிரசாரங்கள் முறைாக நடத்தப்படுவதை அவா்கள் உறுதி செய்வாா்கள். புதிதாத தொடங்கப்பட்டுள்ள கட்சியின் தோ்தல் பணியறையில், பிரசார மேலாண்மை, சட்டப் பணிகள், தரவு மேலாண்மை, ஊடகம் மற்றும் சமூக ஊடகங்கள் ஆகியவற்றுக்கான பிரத்யேக குழுக்கள் அமைக்கப்பட்டுள்ளது. மேலும், தில்லி மக்கள் பாஜக மீது கோபத்தில் உள்ளனா்.

இந்தத் தோ்தலில் சா்வாதிகாரத்திற்கு எதிராகவே மக்கள் வாக்களிப்பாா்கள் என்றாா் கோபால் ராய்.