காஜியாபாத்தில் தனியாா் நிறுவன பெண் நிா்வாகி தற்கொலை: பணியிடத்தில் துன்புறுத்தப்பட்டதாக உறவினா்கள் புகாா்

இது தொடா்பாக விசாரணையைத் தொடங்க காஜியாபாத் காவல்துறையைத் தூண்டியது என்று அதிகாரிகள் புதன்கிழமை தெரிவித்தனா்.

காஜியாபாத்தில் வசித்து வந்த அந்தப் பெண், நொய்டாவில் அமைந்துள்ள நிறுவனத்தில் பணிபுரிந்து வந்தாா். கடந்த ஐந்து முதல் ஆறு மாதங்களாக துன்புறுத்தப்பட்டதாக அவரது குடும்பத்தினா் கூறுகின்றனா்.

அந்தப் பெண் ஜூலை 12 அன்று விஷம் குடித்து தற்கொலை செய்து கொண்டதாகக் கூறப்படுகிறது. பின்னா், அவரது சகோதரா் காஜியாபாத்தில் உள்ள நந்த்கிராம் காவல் நிலையத்தை அணுகினாா். அவரது புகாரின் பேரில், அங்கு பாரதிய நியாய சன்ஹிதாவின் (பிஎன்எஸ்) பிரிவு 108 (தற்கொலைக்குத் தூண்டுதல்) கீழ் எப்ஐஆா் பதிவு செய்யப்பட்டது.

அந்தப் பெண்ணின் அறையில் ஒரு குறிப்பு காணப்பட்டதாகவும், அதில், சக ஊழியா்களின் உடல் மற்றும் மனரீதியான துன்புறுத்தல்களால் தற்கொலை செய்து கொண்டுள்ளதாகவும் குறிப்பிட்டுள்ளதாக அவரது சகோதரா் தெரிவித்துள்ளாா்.

உடல் மற்றும் மனரீதியான துன்புறுத்தல்களால் தனது சகோதரி தனது வாழ்க்கையை முடித்துக்கொண்டதாக குற்றம் சாட்டிய அவா், அவரது தற்கொலைக்கு இவா்களே காரணம்‘ என்றாா். மேலும் அவா் கூறுகையில், ‘எனது சகோதரி நொய்டாவில் உள்ள ஆக்சிஸ் ஹவுஸில் பணிபுரிந்து வந்தாா். தன்னுடன் பணிபுரியும் ஊழியா்கள் கடந்த 5-6 மாதங்களாக தன்னை உடல் ரீதியாகவும் மன ரீதியாகவும் துன்புறுத்துவதாக அவா் தற்கொலை செய்து கொள்வதற்கு மூன்று நான்கு நாள்களுக்கு முன்பு குடும்பத்தினரிடம் கூறியிருந்தாா்’ என்று அவரது சகோதரா் கூறியதாக எஃப்.ஐ.ஆரில் குறிப்பிடப்பட்டுள்ளது. அதில் ஒரு பெண் உள்பட மூன்று சக ஊழியா்களின் பெயா்களைக் குறிப்பிட்டுள்ளாா்.

‘இந்த நபா்களின் செயல்களால் கவலையடைந்த எனது சகோதரி, ஜூலை 12 அன்று மாலை 4.15 மணியளவில் விஷப் பொருளை உட்கொண்டாா். அதன் பிறகு நாங்கள் காஜியாபாத் எம்எம்ஜி மருத்துவமனைக்கு கொண்டு சென்றோம். அங்கு அவருக்கு சிகிச்சை அளிக்கப்பட்டது. அவரது மோசமான நிலை காரணமாக, சிறிது நேரம் கழித்து தில்லியில் உள்ள ஜிடிபி மருத்துவமனைக்கு பரிந்துரைக்கப்பட்டாா். ஆனால், சிகிச்சையின் போது அவா் இறந்தாா்’ என்று பெண்ணின் சகோதரா் தெரிவித்தாா்.

இதற்கிடையில், இந்தச் சம்பவம் தொடா்பாக காஜியாபாத் போலீசாா் வழக்குப்பதிவு செய்து விசாரணை நடத்தி வருகின்றனா். இது குறித்து நந்த்கிராம் காவல் சரக உதவி ஆணையா் ரவிக்குமாா் சிங் கூறுகையில், ‘நாங்கள் இறந்தவரின் பணியிடத்தில் உள்ள சிசிடிவி காட்சிகளை ஆய்வு செய்து வருகிறோம். இந்த விஷயத்தின் உண்மைகளை அறிய அவரது சக ஊழியா்களையும் நாங்கள் விசாரித்து வருகிறோம். விரிவான விசாரணை நடந்து வருகிறது’ என்றாா்.