வேலை உறுதியளிப்பு திட்டம் ஒத்திவைக்கப்படுமா? விவசாய பணிகளுக்கு ஆள் பற்றாக்குறை

திருநெல்வேலி, நவ. 25: வடகிழக்குப் பருவ மழை தீவிரமடைந்துள்ள நிலையில் தேசிய கிராமப்புற வேலை உறுதியளிப்பு திட்டத்தால் விவசாயப் பணிகளுக்கு ஆள் கிடைக்காமல் விவசாயிகள் அவதியுற்று வருகின்றனர்.

 வேலையின்மை காரணமாக ஏற்படும் வறுமையை தடுக்க மத்திய அரசானது மகாத்மா காந்தி தேசிய ஊரக வேலை உறுதித் திட்டத்தை 2005 ஆம் ஆண்டு முதல் செயல்படுத்தி வருகிறது. இந்த திட்டமானது தமிழ்நாட்டில் கடந்த 2006 ஆம் ஆண்டு பிப்ரவரி முதல் செயல்பட்டு வருகிறது.

  முதல் கட்டமாக விழுப்புரம், கடலூர், திருவண்ணாமலை, நாகப்பட்டினம், திண்டுக்கல், சிவகங்கை ஆகிய 6 மாவட்டங்களில் தொடங்கப்பட்டது. இரண்டாவது கட்டமாக தஞ்சாவூர், திருவாரூர், திருநெல்வேலி, கரூர் ஆகிய நான்கு மாவட்டங்களுக்கும் விரிவுபடுத்தப்பட்டது. மூன்றாவது கட்டமாக 2008 ஆம் ஆண்டு முதல் நாட்டில் உள்ள அனைத்து மாவட்டங்களிலும் இந்த திட்டம் செயல்படுத்தப்பட்டு வருகிறது.

 கிராமப்புறங்களில் உடல் உழைப்பை மேற்கொள்ள விரும்பும் 18 வயது பூர்த்தி அடைந்த ஒவ்வொரு குடும்பத்திற்கும் ஆண்டில் 100 நாள்களுக்கு குறையாமல் வேலைவாய்ப்பு அளிக்கப்பட வேண்டும் என்பது இந்த திட்டத்தின் பிரதான நோக்கம். இந்த திட்டத்தின் கீழ் வேலை செய்வோருக்கு ஒரு நாள் கூலியாக |100 வழங்கப்பட்டு வருகிறது.

 இந்த திட்டம் தொடங்கப்பட்ட நாள் முதல் விவசாயப் பணிகளுக்கு ஆள் பற்றாக்குறை ஏற்பட்டுள்ளதாக விவசாயிகள் தொடர்ந்து புகார் கூறி வருகின்றனர். விவசாயப் பணிக்கு சென்றால் குறைந்தபட்சம் 6 மணி நேரமாவது வேலைபார்க்க வேண்டும். அதற்கு கிடைக்கும் கூலியைவிட ஊரக வேலை உறுதித் திட்ட வேலையானது எளிதானதாகவும், அதிகமான கூலி கிடைப்பதும் காரணமாக கூறப்படுகிறது.

 வேலை உறுதியளிப்பு திட்டத்தின் கீழ் சாலைகளை அமைத்தல், செப்பனிடுதல், நீர்நிலைகளை சீரமைத்தல் போன்ற பணிகளே பிரதானமாக மேற்கொள்ளப்பட்டு வருகின்றன. இந்தப் பணிகளுக்கு செல்வோர் விதிமுறைப்படியான வேலை அளவை கூட செய்வதில்லை என்றும், குறைந்த அளவு வேலை செய்துவிட்டு, கணக்கெடுக்க ஆள் வரும் வரை மரத்தடியில் அமர்ந்து பொழுதைப் போக்கிவிட்டு கூலியை மட்டும் பெற்றுக் கொண்டு வந்து விடுவதால் மற்ற வேலைகளுக்கு செல்ல அவர்கள் விரும்புவதில்லை என்ற கருத்தும் கூறப்பட்டு வருகிறது.

 திட்டத்தை அமல்படுத்தும் கிராம ஊராட்சி நிர்வாகிகளில் சிலர் விதிமுறைப்படி வேலை செய்ய வற்புறுத்தும்போது சில இடங்களில் பிரச்னை ஏற்படுவதாகவும், உள்ளூரில் கெட்ட பெயரை ஏற்படுத்திக் கொள்ள விரும்பாத உள்ளாட்சி பிரதிநிதிகள் அதைக் கண்டும், காணாததுமாக இருந்து விடுவதாகவும் கூறப்படுகிறது.

 விவசாயத் தொழில் பிரதானமாக உள்ள திருநெல்வேலி போன்ற மாவட்டங்களில் இந்த திட்டத்தால் சாதகத்தை விட பாதகமே அதிகம் என்றும், விவசாயத்திற்கு ஆள்கள் கிடைக்காததோடு கூலியும் கட்டுப்படியாகத நிலைக்கு உயர்ந்து விட்டதாகவும் விவசாயிகள் தரப்பில் கூறப்படுகிறது.

 இந்நிலையில், தற்போது வட கிழக்குப் பருவ மழை பெய்யத் தொடங்கியுள்ளது. விவசாயிகள் வேளாண்மை பணிகளை தொடங்கியுள்ளனர். கிணற்றுப் பாசன வசதி உள்ள விவசாயிகள் நடுவை பணிகளை மேற்கொண்டு வருகின்றனர். ஆனால் நடுவைக்கு ஆள்கள் கிடைப்பதில்லை. இன்னும் ஒரு மாதம் கழித்தால் களை பறிக்க ஆள்கள் தேவைப்படுவர். அதற்கும் ஆள்கள் கிடைக்காத நிலை ஏற்படும்.

  இம் மாவட்டத்தில் நடப்பு பிசானப் பருவத்தில் சுமார் 67 ஆயிரம் ஹெக்டேரில் நெல் பயிரிட இலக்கு நிர்ணயிக்கப்பட்டுள்ளது. இம் மாவட்டத்தில் 2001-ல் மக்கள் தொகை கணக்கெடுப்பின்படி சுமார் 1.66 லட்சம் ஆண் விவசாயத் தொழிலாளர்களும், சுமார் 1.11 லட்சம் பெண் விவசாயத் தொழிலாளர்களும் என மொத்தம் 2.77 லட்சம் தொழிலாளர்கள் உள்ளனர்.

 தேசிய ஊரக வேலை உறுதியளிப்பு திட்டத்தின் கீழ் திருநெல்வேலி மாவட்டத்தில் சுமார் 3.95 லட்சம் பேருக்கு வேலைவாய்ப்பு அளிக்க அடையாள அட்டைகள் வழங்கப்பட்டுள்ளன. இதனால் வேளாண்மை பணிகளுக்கு பெருமளவில் ஆள் பற்றாக்குறை ஏற்பட்டுள்ளது.

 ஏற்கெனவே, விவசாயப் பணிகளுக்கான கூலி அதிகரித்து விட்டதால் லாபம் கிடைப்பதில்லை. மேலும், முன்புபோல தொழிலாளர்களை வேலை செய்யவும் வற்புறுத்த முடிவதில்லை. நான்கு மணி நேரத்திற்கும் குறைவாகவே வேலை செய்துவிட்டு கூலியை பெற்றுக் கொண்டு சென்று விடுவதாக விவசாயிகள் கூறி வருகின்றனர். அதுமட்டுமன்றி ஆள் பற்றாக்குறை நிலவி வருவதால் அதிகமான கூலியும் கொடுக்க வேண்டியது உள்ளது. உழவு செலவு, விதை, இடுபொருள் விலையும் அதிகரித்துள்ளது. இப்போது கூலியும் அதிகரித்து வருவதால் பெருத்த இன்னல்களுக்கு ஆளாகி வருவதாக விவசாயிகள் தரப்பில் கூறப்படுகிறது.

 எனவே, விவசாயப் பணிகள் துரிதமாக நடைபெற வேண்டிய காலத்தில் மட்டுமாவது இந்த கிராமப்புற வேலை உறுதியளிப்பு திட்டத்தை குறிப்பிட்ட காலத்திற்கு நிறுத்திவைக்க வேண்டும். அப்போதுதான் விவசாயப் பணிகளை தொய்வின்றி குறிப்பிட்ட காலத்திற்குள் முடிக்க முடியும். பணிகளில் சுணக்கம் ஏற்பட்டால் அதனால் ஏற்படும் காலதாமதம் அறுவடை சமயத்தில் மழை போன்றவற்றால் பாதிக்கப்படும் என்கின்றனர் விவசாயிகள்.