‘வெற்றி நடை திட்ட மையங்களில் இளைஞா்கள் பயிற்சி பெறலாம்’

திருநெல்வேலி: தமிழக அரசின் வெற்றி நடை திட்ட மையங்கள் மூலம் பயிற்சி பெற இளைஞா்களுக்கு வாய்ப்பளிக்கப்பட உள்ளது என திருநெல்வேலி மாவட்ட ஆட்சியா் இரா.சுகுமாா் தெரிவித்துள்ளாா்.

இதுதொடா்பாக அவா் வெளியிட்டுள்ள செய்திக்குறிப்பு: திருநெல்வேலி மாவட்டத்தில் கல்லூரி மாணவா்கள், படித்து முடித்து வேலை தேடும் இளைஞா்கள், கல்லூரி இடைநின்றவா்கள், 10 ஆம் வகுப்பு மற்றும் பிளஸ் 2 தோ்ச்சி பெற்று கல்லூரி படிப்பை தொடர இயலாத இளைஞா்கள் மற்றும் இளம்பெண்களுக்காக, வெற்றி நடை என்ற திட்டத்தின் கீழ் தமிழக காவல்துறை, இந்திய ராணுவம், மத்திய காவல் துறை, அக்னிவீரா் உள்ளிட்ட ஒருங்கிணைந்த சீருடை பணியாளா்களுக்கான பயிற்சி மையங்கள் அமைக்கப்பட உள்ளன.

பேட்டை மதிதா இந்துக் கல்லூரி, சங்கா்நகரில் உள்ள சங்கா் மேல்நிலைப் பள்ளி, அம்பாசமுத்திரம் அரசு கலைக் கல்லூரி, வீரவநல்லூா் புனித ஜான்ஸ் மேல்நிலைப் பள்ளி, நான்குனேரி சங்கா்ரெட்டியாா் அரசு மேல்நிலைப் பள்ளி, வள்ளியூா் அரசு மேல்நிலைப் பள்ளி, விஜயநாராயணம் ரெக்ட்தொழில்நுட்ப கல்லூரி, தேவா்குளம் சங்கரி மெட்ரிக் மேல்நிலைப் பள்ளி ஆகிய இடங்களில் இம்மையங்கள் செயல்படும்.

இவற்றில் இளைஞா்களுக்கு உடல் மற்றும் எழுத்து தோ்விற்கான பயிற்சிகள் வல்லுநா்களால் வழங்கப்படும். உடற்தகுதிக்கான பயிற்சிகள் திங்கள் முதல் வெள்ளிக்கிழமை வரை தினமும் காலை 5.30 மணி முதல் 7.30 மணி வரையும், எழுத்து மற்றும் இதர தோ்வுகளுக்கான பயிற்சிகள் வார இறுதி நாள்களில் காலை 10 மணி முதல் மாலை 5 மணி வரையும் நடைபெறும்.

எனவே, 17 முதல் 25 வயதிற்குள்பட்ட இளைஞா்கள் மற்றும் இளம்பெண்கள் ஞாயிற்றுக்கிழமை (ஜன. 18) காலை 9 மணிக்கு தங்கள் குடியிருப்புப் பகுதிக்கு அருகில் அமைந்துள்ள வெற்றிநடை திட்டம் பயிற்சி மையங்களில் சோ்வது குறித்து தெரிவிக்கலாம் எனக் கூறியுள்ளாா்.