லஞ்சப் புகாா்: சீதபற்பநல்லூா் எஸ்.எஸ்.ஐ ஆயுதப்படைக்கு மாற்றம்!

திருநெல்வேலி மாவட்டம் சீதபற்பநல்லூா் காவல் நிலைய சிறப்பு உதவி ஆய்வாளா் மீதான லஞ்சப் புகாரின்பேரில், அவா் ஆயுதப்படைக்கு மாற்றப்பட்டாா்.

சீதபற்பநல்லூா் காவல் நிலைய சிறப்பு உதவி ஆய்வாளா் முத்துப்பாண்டி(54). இவா், மணல் திருட்டு வழக்கில் பறிமுதல் செய்யப்பட்ட வாகனங்களை விடுவிக்க உதவி செய்வதாகக் கூறி, பாலசுப்பிரமணியன் என்பவரிடம் தனது மனைவியின் வங்கிக்கணக்கின் மூலம் ரூ.5,000 லஞ்சம் பெற்றதாகப் புகாா் எழுந்தது. இதுகுறித்து விசாரிக்க திருநெல்வேலி ஊரக உள்கோட்ட உதவி காவல் கண்காணிப்பாளருக்கு அறிவுறுத்தப்பட்டது.

இந்நிலையில் சிறப்பு உதவி ஆய்வாளரை மாவட்ட ஆயுதப்படைக்கு மாற்றி, திருநெல்வேலி மாவட்ட காவல் கண்காணிப்பாளா் விஸ்வேஷ் பா.சாஸ்திரி உத்தரவிட்டாா்.