கேரளத்துக்கு காரில் கடத்திச் சென்ற 900 கிலோ ரேஷன் அரிசி பறிமுதல்

கன்னியாகுமரி மாவட்டம், இடைக்கோடு அருகே காரில் கேரளத்துக்கு கடத்திச் செல்ல முயன்ற 900 கிலோ ரேஷன் அரிசியை மாவட்ட பறக்கும் படை வட்டாட்சியர் தலைமையிலான அதிகாரிகள் சனிக்கிழமை அதிகாலையில் பறிமுதல் செய்தனர்.

குமரி மாவட்டத்திலிருந்து ரேஷன் அரிசியைக் குறைந்த விலைக்கு வாங்கி அவற்றை கேரளத்துக்கு கடத்திச் சென்று அதிக விலைக்கு விற்பனை செய்வது தொடர்ந்து நடைபெற்று வருகிறது. இதைத் தடுக்க மாவட்டத்தின் எல்லையோரப் பகுதிகளில் 30 க்கும் மேற்பட்ட சிறப்பு சோதனைச் சாவடிகள் அமைக்கப்பட்டு போலீஸார் கண்காணிப்புப் பணியில் ஈடுபட்டு வருகிறார்கள். இதையும் மீறி ரேஷன் அரிசி, மணல் கடத்திச் செல்வது தொடர்ந்து நடைபெற்று வருகிறது.

இந்நிலையில் மாவட்ட பறக்கும்படை வட்டாட்சியர் இக்னேசியஸ் சேவியர், ஓட்டுநர் ஜான்பிரைட் உள்ளிட்டோர் சனிக்கிழமை அதிகாலையில் மஞ்சாலுமூடு பகுதியில் வாகன கண்காணிப்பில் ஈடுபட்டிருந்தனர்.

அப்போது அப் பகுதி வழியாக வந்த காரை சந்தேகத்தின் பேரில் நிறுத்த சைகை காட்டினர். கார் நிற்காமல் சென்றதையடுத்து அதிகாரிகள் வாகனத்தில் துரத்திச் சென்று இடைக்கோடு பகுதியில் மடக்கிப் பிடித்தனர். கார் ஓட்டுநர் அங்கிருந்து தப்பியோடிவிட்டார்.

தொடர்ந்து காரை சோதனையிட்டதில் சாக்கு மூட்டைகளில் 900 கிலோ ரேஷன் அரிசி பதுக்கி வைத்திருந்தது தெரியவந்தது. அவற்றை காருடன் பறிமுதல் செய்த அதிகாரிகள் விளவங்கோடு வட்ட வழங்கல் அலுவலகம் கொண்டு வந்தனர். தொடர்ந்து ரேஷன் அரிசியை காப்புக்காடு நுகர்பொருள் வாணிபக் கழக கிட்டங்கியில் ஒப்படைத்தனர்.