சிவாலய ஓட்ட பக்தர்கள் பாதுகாப்பாக செல்ல நடவடிக்கை  எடுக்க வலியுறுத்தல்

குமரி மாவட்டத்தில் ஞாயிற்றுக்கிழமை சிவராத்திரி சிவாலய ஓட்டம் நடைபெறும் நிலையில் பக்தர்கள் பாதுகாப்பாக பயணம் செய்யும் வகையிலான நடவடிக்கைகளை மாவட்ட நிர்வாகம் விரைந்து  செய்ய வேண்டுமென்று கோரிக்கை விடுக்கப்பட்டு வருகிறது.

குமரி மாவட்டத்தில் வரலாற்று சிறப்பு மிக்க சிவராத்திரி சிவாலய ஓட்டம் ஞாயிற்றுக்கிழமை பிற்பகலில் தொடங்கி செவ்வாக்கிழமை வரை நடைபெறுகிறது. முதலாவது சிவாலயமான திருமலை மகாதேவர் கோயிலில் இருந்து தொடங்கி 12 ஆவது சிவாலயமான நட்டாலம் சங்கரநாராயணர் கோயிலில் இந்த ஓட்டம் நிறைவடைகிறது.

110 கி.மீ. தொலைவு கொண்ட இந்த ஓட்டத்தில் பக்தர்கள் பயணம் செய்யும் சாலை பக்தர்களுக்கு இடையூறு அளிக்கும் வகையில் இருப்பதாக  இந்து அமைப்புகள் மற்றும் பக்தர் சங்க அமைப்புகள் புகா தெரிவிக்கின்றன. குறிப்பாக பல இடங்களில் சாலையோரங்களில் ரப்பர் மரத்தடிகள் குவிக்கப்பட்டுள்ளன. பல இடங்களில் கருங்கற்கள் குவிக்கப்பட்டுள்ளன. மேலும் முக்கிய நகர சந்திப்புகளில் தேவையற்ற வகையில் இரு சக்கர வாகனங்கள் உள்ளிட்டவை நிறுத்தி வைக்கப்பட்டுள்ளன.

இதற்கெல்லாம் மேலாக பெரும் பகுதி சாலையில் குழிகள் நிறைந்து காணப்படுகின்றன.    எனவே மாவட்ட நிர்வாகமும், காவல் துறையும், உள்ளாட்சி அமைப்புகளும் விரைந்து செயல்பட்டு பக்தர்கள் இரவு நேரங்களில் தடையின்றி செல்லவும், பாதுகாப்பாகச் செல்லவும் தேவையான நடவடிக்கைகளை எடுக்க வேண்டுமென்று கோரிக்கை விடுக்கப்பட்டுள்ளது.