4 வட்டங்களில் நாளை பொது விநியோகத் திட்ட குறைதீர் முகாம்

கன்னியாகுமரி மாவட்டத்தில் 4  வட்டங்களிலும் பொது விநியோகத் திட்ட குறைதீர் முகாம் சனிக்கிழமை (செப். 8) நடைபெறுகிறது. 
இதுகுறித்து மாவட்ட   ஆட்சியர் பிரசாந்த் மு.வடநேரே வெளியிட்ட செய்திக்குறிப்பு: பொது விநியோகத் திட்ட சிறப்பு மக்கள் குறைதீர் முகாம் அகஸ்தீசுவரம் வட்டத்தில் தேரூர் பேரூராட்சி அலுவலகம், தோவாளை வட்டத்தில் ஆரல்வாய்மொழி பேரூராட்சி அலுவலகம், கல்குளம் வட்டத்தில் திக்கணங்கோடு ஊராட்சி அலுவலகம், விளவங்கோடு வட்டத்தில் மாஞ்சாலுமூடு ஊராட்சி அலுவலகம் ஆகியவற்றில் வட்ட வழங்கல் அலுவலர் தலைமையில் முகாம்  நடைபெறுகிறது. இம் முகாம் சனிக்கிழமை காலை 10 மணி முதல் பிற்பகல் 1 மணி வரை நடைபெறும்.  
மேற்கண்ட பகுதிக்குள்பட்ட குடும்ப அட்டைதாரர்களில் மின்னணு குடும்ப அட்டையில் புகைப்படம் மற்றும் தேவையான ஆவணங்கள் இல்லாமல் இதுவரை மின்னணு குடும்ப அட்டை பெற முடியாமல் ரேஷன் கடையில்  ஒட்டப்பட்டுள்ள பட்டியலில் இடம் பெற்றுள்ள குடும்ப அட்டைதாரர்கள் தங்களது குடும்பத் தலைவரின் புகைப்படம், செல்லிடப்பேசி எண், ஆதார் எண் பதிவு செய்தல் போன்ற திருத்தங்கள் செய்து விரைவில் மின்னணு குடும்ப அட்டை பெறுவதற்கு மனு அளித்து தீர்வு காணலாம் என செய்திக்குறிப்பில் தெரிவிக்கப்பட்டுள்ளது.