தினமும் 1 கோடி பேருக்கு கரோனா தடுப்பூசி : காங்கிரஸ் வலியுறுத்தல்

இந்தியாவில் தினமும் 1 கோடி பேருக்கு கரோனா தடுப்பூசி இலவசமாக மத்திய அரசு வழங்க வேண்டும் என்று கோரி காங்கிரஸ் கட்சியின் சாா்பில் மாவட்ட ஆட்சியா் மா.அரவிந்திடம் கோரிக்கை மனு அளிக்கப்பட்டது.

இது குறித்து, கன்னியாகுமரி மக்களவை உறுப்பினா் விஜய்வசந்த் தலைமையில், சட்டப் பேரவை உறுப்பினா்கள் கிள்ளியூா் ராஜேஷ்குமாா், விளவங்கோடு விஜயதரணி உள்ளிட்டோா், குடியரசு தலைவருக்கு மாவட்ட ஆட்சியா் மூலம் வெள்ளிக்கிழமை அளித்துள்ள மனு: கரோனா வைரஸ் பரவல் அதிகரித்து வரும் நிலையில் அதனை தடுப்பதற்காக அனைவருக்கும் தடுப்பூசி போட வேண்டும் என கூறப்பட்டதன்அடிப்படையில் தற்போது தடுப்பூசி போடும் பணி தொடங்கி நடைபெற்று வருகிறது.

ஆனால் போதிய அளவு தடுப்பூசி மத்திய அரசு வழங்காததால், தமிழகம் உள்பட பல மாநிலங்களில் தடுப்பூசி போடுவதில் பாதிப்பு ஏற்பட்டுள்ளது. இதனால் பல தடுப்பூசி மையங்கள் மூடப்பட்டுள்ளன. இந்த நிலையில் அனைத்து மக்களுக்கும் இலவசமாக தடுப்பூசி போடுகிற முழு பொறுப்பை மத்திய அரசு ஏற்க வேண்டும். தினமும் 1 கோடி பேருக்கு தடுப்பூசி செலுத்த வேண்டும். தடுப்பூசி விலையில் நிலவும் குழப்பங்களை சரி செய்ய வேண்டும் என்று குறிப்பிடப்பட்டுள்ளது.

இதில், மாவட்ட காங்கிரஸ் தலைவா்கள் ராதாகிருஷ்ணன்( குமரி கிழக்கு) , தாரகை கத்பா்ட் (குமரி மேற்கு) உள்பட பலா் கலந்து கொண்டனா்.