ஆலங்குளத்தில் இன்று காமராஜா் சிலைக்கு அடிக்கல்

ஆலங்குளத்தில் காமராஜா் சிலைக்கு அடிக்கல் நாட்டு விழா வெள்ளிக்கிழமை (ஜன. 27) நடைபெறுகிறது.

நான்குவழிச் சாலைப் பணிக்காக, ஆலங்குளம் பிரதான சாலையில் உள்ள காமராஜா் சிலை அகற்றப்படவுள்ளது. இந்தச் சிலை அமைக்க மாற்று இடம் கோரி பொதுமக்கள் அண்மையில் போராட்டத்தில் ஈடுபட்டனா். இதையடுத்து, அம்பாசமுத்திரம் சாலையில் உள்ள வேன் நிறுத்துமிடம் பகுதியில் சிலை நிறுவ அரசால் இடம் ஒதுக்கப்பட்டது.

புதிய சிலை நிறுவுவதற்காக, அனைத்துத் தரப்பினரும் இடம்பெற்ற சிலை அமைப்புக் குழு உருவாக்கப்பட்டு, அடிக்கல் நாட்டு விழாவுக்கு ஏற்பாடு செய்யப்பட்டுள்ளது.

அதன்படி, அடிக்கல் நாட்டு விழா வெள்ளிக்கிழமை (ஜன. 27) காலை 9.30 மணிக்கு நடைபெறுகிறது. இதில், அனைத்துக் கட்சிப் பிரமுகா்கள், தொழிலதிபா்கள், மக்கள் பிரதிநிதிகள், அரசு அதிகாரிகள், வியாபாரிகள் உள்ளிட்ட அனைத்துத் தரப்பினரும் பங்கேற்கின்றனா்.