களக்காடு அருகே டெம்போ ஓட்டுநர் அடித்துக் கொலை: தக்கலையை சேர்ந்தவர்

குமரி மாவட்டம், தக்கலையைச் சேர்ந்த டெம்போ ஓட்டுநர், திருநெல்வேலி மாவட்டம், களக்காடு அருகே திங்கள்கிழமை அடித்துக் கொல்லப்பட்டார்.

தக்கலை பெருமாள் கோயில் தெருவைச் சேர்ந்தவர் குமாரதாஸ் (53). டெம்போ  ஓட்டுநர். இவர், திங்கள்கிழமை காலையில் தக்கலை வாகன நிறுத்தத்தில் நின்று கொண்டிருந்தபோது, அங்கு வந்த இரண்டு பேர் களக்காடு சென்று வாழைக்கன்றுகள் ஏற்றிவர வேண்டும் என்று கூறினராம். இதையடுத்து, மூன்று பேரும் தக்கலையில் இருந்து புறப்பட்டனர். நான்குனேரி வழியாக களக்காடு பிரதான சாலையில் வந்து, பின்னர் கடம்போடுவாழ்வு அருகே மங்கம்மாள் சாலையில் சென்று கொண்டிருந்தபோது, உடன் வந்த இரண்டு பேரும் குமாரதாஸை கீழே தள்ளி தாக்கிவிட்டு தப்பியோடிவிட்டனராம். பலத்த காயமடைந்த குமாரதாஸ், தனது செல்லிடப்பேசியில் மனைவியைத் தொடர்புகொண்டு நடந்த சம்பவத்தை கூறியுள்ளார். இதுகுறித்து, அவரது மனைவி போலீஸில் தெரிவித்த தகவலின் அடிப்படையில், தக்கலை மற்றும் களக்காடு போலீஸார் சம்பவ இடத்துக்குச் சென்றனர். அங்கு குமாரதாஸ் இறந்து கிடந்தது தெரியவந்தது. அருகே அவரது டெம்போவும் நின்று கொண்டிருந்தது.

குமாரதாஸை அடித்துக் கொலை செய்தவர்கள் யார், எதற்காக கொன்றார்கள் என்பதுகுறித்து போலீஸார் வழக்குப் பதிந்து விசாரித்து வருகின்றனர்.