அரசு ஊழியர்கள் பங்கேற்கும் மாநில வாலிபால் போட்டி தொடக்கம்

அரசு ஊழியர்களுக்கான மாநில அளவிலான வாலிபால் போட்டி திருநெல்வேலியில் வியாழக்கிழமை தொடங்கியது.

தமிழ்நாடு விளையாட்டு மேம்பாட்டு ஆணையத்தின் திருநெல்வேலி பிரிவு சார்பில் 2015-16ஆம் ஆண்டுக்கான அரசு ஊழியர்களின் மாநில அளவிலான வாலிபால் போட்டி பாளையங்கோட்டையில் வியாழக்கிழமை (மார்ச் 3) தொடங்கி 3 நாள்கள் நடைபெறுகிறது.

இதன் தொடக்க விழா, பாளையங்கோட்டை அண்ணா விளையாட்டு மைதானத்தில் வியாழக்கிழமை நடைபெற்றது. போட்டியில், திருநெல்வேலி, தூத்துக்குடி, கன்னியாகுமரி, புதுக்கோட்டை, சிவகங்கை, நாகப்பட்டினம், தருமபுரி, சேலம், திருப்பூர், தஞ்சாவூர், நீலகிரி, ஈரோடு, கரூர், மதுரை, திண்டுக்கல், ராமநாதபுரம், புதுக்கோட்டை, திருவண்ணாமலை, திருவாரூர், வேலூர், கிருஷ்ணகிரி, சென்னை ஆகிய மாவட்டங்களைச் சேர்ந்த 23 அணிகள் பங்கேற்றுள்ளன. ஆண், பெண் என இரு பாலருக்கும் தனித்தனியே நாக் - அவுட் முறையில் போட்டிகள் நடைபெறுகின்றன.

போட்டியை, திருநெல்வேலி மாவட்ட ஆட்சியர் மு. கருணாகரன் தொடக்கிவைத்தார். வணிகவரித் துறை இணை ஆணையர் கே.எம். கார்த்திகேயினி, திருநெல்வேலி வாலிபால் கழக மாவட்டச் செயலர் என். ரவீந்திரன், பாளையங்கோட்டை விளையாட்டு விடுதி மேலாளர் பிராங்க்பால் ஜெயசீலன், மாவட்ட விளையாட்டு அலுவலர் சேவியர் ஜோதி சற்குணம் ஆகியோர் விளையாட்டு வீரர்களுக்கு வாழ்த்துத் தெரிவித்தனர். முதல்நாள் போட்டியாக ஆண்கள் பிரிவில், ஈரோடு - தருமபுரி அணிகள் மோதின. இதில், தருமபுரி அணி வென்றது.

திருவாரூர் - நாகப்பட்டினம் அணிகள் மோதியதில் நாகப்பட்டினம் அணி வென்றது. தூத்துக்குடி - திருநெல்வேலி அணிகளுக்கிடையே நடைபெற்ற போட்டியில் திருநெல்வேலி அணி வென்றது.

கன்னியாகுமரி - திண்டுக்கல் அணிகள் மோதியதில் திண்டுக்கல் அணி வென்றது. தொடர்ந்து சனிக்கிழமை வரை போட்டிகள் நடைபெறும்.