திருட்டு வழக்கில் இளைஞர் கைது

பாளையங்கோட்டையில் ஓய்வுபெற்ற தலைமை ஆசிரியர் மோட்டார் சைக்கிள் பெட்டியில் இருந்து ரூ.2 லட்சத்தை திருடியது தொடர்பான வழக்கில் திருச்சி  இளைஞரை போலீஸார் கைது செய்தனர். 
பாளையங்கோட்டை, கோரிப்பள்ளத்தைச் சேர்ந்தவர் பொன்ராஜ்(60). ஓய்வுபெற்ற தலைமை ஆசிரியர். இவர்,  பாளையங்கோட்டை பேருந்து நிறுத்தம் அருகேயுள்ள வங்கியில் கடந்த மாதம் 21 ஆம் தேதி ரூ.2 லட்சம் கடன்பெற்று தனது மோட்டார் சைக்கிள் பெட்டியில் வைத்துவிட்டு பக்கத்து கடைக்குச் சென்றாராம்.  திரும்பி வந்தபோது, அந்த பணம் திருடப்பட்டது தெரியவந்தது. இதுகுறித்த புகாரின்பேரில், பாளை. குற்றப்பிரிவு போலீஸார்  வழக்குப்பதிந்து விசாரித்தனர். இந்நிலையில் ஞாயிற்றுக்கிழமை புதிய பேருந்து நிலையத்தில் சந்தேக நபரைப் பிடித்து  எஸ்.ஐ. நாகராஜன் மற்றும் போலீஸார் விசாரித்தனர். அதில்,  திருச்சி, திருவெறும்பூரைச் சேர்ந்த சிவா(30) என்பதும், ஓய்வுபெற்ற தலைமை ஆசிரியரின் பணத்தைத் திருடியவர் என்பதும் தெரியவந்ததாம். இதையடுத்து அவரை கைது செய்த  போலீஸார், ரூ. 1,17,000-ஐ மீட்டனர்.