குற்றாலம் அருவிகளில் வெள்ளப்பெருக்கு

குற்றாலம் பகுதியில் புதன்கிழமை பெய்த தொடர் சாரல் மழை காரணமாக அருவிகளில் வெள்ளப்பெருக்கு ஏற்பட்டது.
குற்றாலம் பகுதியில் கடந்த சில நாள்களாக சாரல் இல்லாததால் பேரருவி, ஐந்தருவி, பழைய குற்றாலம் உள்ளிட்ட அனைத்து அருவிகளிலும் நீர்வரத்து வெகுவாகக் குறைந்தது. இதனால் அருவிகளில் சுற்றுலாப்பயணிகள் நீண்ட வரிசையில் நின்று குளித்தனர்.
இந்நிலையில், செவ்வாய்க்கிழமை இரவில் மீண்டும் சாரல்மழை பெய்யத் தொடங்கியது. புதன்கிழமை அதிகாலைமுதல் பெய்த தொடர் சாரல் காரணமாக பேரருவி, ஐந்தருவி, பழைய குற்றாலம் அருவிகளில் நீர்வரத்து அதிகரித்தது. இதனால் அருவிகளில் குளிக்க போலீஸார் தடைவிதித்தனர். மாலையில் பேரருவியில் நீர்வரத்து சற்று குறைந்ததையடுத்து, மையப்பகுதியில் தடுப்பு ஏற்படுத்தப்பட்டு, ஓரமாக நின்று குளிக்க சுற்றுலாப்பயணிகள் அனுமதிக்கப்பட்டனர். தொடர்ந்து, பழைய குற்றாலத்திலும் குளிக்க அனுமதி அளிக்கப்பட்டது. ஆனால், ஐந்தருவியில் வெள்ளப்பெருக்கு  குறையாததால் குளிக்க அனுமதிக்கப்படவில்லை.