குற்றாலத்தில் கோயில் கடை மீட்பு

குற்றாலத்தில், அருள்மிகு குற்றாலநாதர் கோயிலுக்குச் சொந்தமான கடை புதன்கிழமை மீட்கப்பட்டது.
குற்றாலத்தில் வரசித்தி விநாயகர் கோயிலுக்கு மேல்புறம் உள்ள, குற்றாலநாதர் கோயிலுக்குச் சொந்தமான கடை வி. தனசேகர் என்பவருக்கு 1.7.96முதல் 30.6.99வரை 3 ஆண்டுக்கு வாடகைக்கு கொடுக்கப்பட்டிருந்தது. 
ஒப்பந்தக் காலம் முடிந்த பின்னரும் அவர் கடையை கோயில் நிர்வாகத்திடம் ஒப்படைக்கவில்லை. பின்னர், அவர் அளித்த தவறான தகவலின்பேரில் ஜெயராம் என்பவர், "அந்தக் கடை தனக்குச் சொந்தமானது; கோயில் நிர்வாகமும், வி.தனசேகரன் என்பவரும் சேர்ந்து தன்னை ஏமாற்றி, அந்த இடத்தை அபகரித்துவிட்டதாக' தென்காசி சார்பு நீதிமன்றத்தில் வழக்குத் தொடர்ந்தார். 
அந்த வழக்கு தள்ளுபடி செய்யப்பட்டது. இந்நிலையில், ஒப்பந்தக் காலம் முடிந்தும் ஒப்படைக்காததால், கடையை தனசேகர் ஆக்கிரமித்ததாகக் கூறி திருநெல்வேலி இணை ஆணையர் அலுவலகத்தில் வழக்குத் தொடரப்பட்டது. கடையிலிருந்து தனசேகரை வெளியேற்ற திருநெல்வேலி உதவி ஆணையருக்கு உத்தரவிடப்பட்டது. இதையடுத்து, வி.தனசேகரன், சென்னை ஆணையர் நீதிமன்றத்திலும், உயர்நீதிமன்றத்திலும் பல வழக்குகள் தொடர்ந்தார். கோயில் சொத்தை ஒப்படைக்க தனசேகருக்கு சென்னை உயர்நீதிமன்றம் உத்தரவிட்டது. 
அதன்பேரில், இந்து சமய அறநிலையத் துறை உதவி ஆணையர் தி. சங்கர், குற்றாலம் கோயில் நிர்வாக அலுவலர் பாலசுப்பிரமணியன், கிராம உதவியாளர் கருப்பசாமி, ஓய்வுபெற்ற நில அளவையர் பட்டமுத்து, கோயில் செயல் அலுவலர் செல்வகுமாரி ஆகியோர் புதன்கிழமை சென்று, அந்தக் கடையை மீட்டு "சீல்' வைத்தனர்.