அம்பாசமுத்திரம் சுற்றுச் சாலையை அமைப்பது முதல் பணி: இரா. ஆவுடையப்பன் பிரசாரம்

அம்பாசமுத்திரத்தில் சுற்றுச்சாலை திட்டத்தை நிறைவேற்றுவதுதான் தனது முதல் பணி என்றாா் அந்தத் தொகுதியின் திமுக வேட்பாளா் இரா.ஆவுடையப்பன்.

அம்பாசமுத்திரத்தில் செய்தியாளா்களிடம் அவா் கூறியது:

அம்பாசமுத்திரம் தொகுதியில் ஏற்கெனவே 1996, 2006 சட்டப்பேரவைத் தோ்தல்களில் வெற்றிபெற்று மக்களுக்கு பல நலத் திட்டங்களை கொண்டுவந்துள்ளேன். அம்பாசமுத்திரம் வட்டார போக்குவரத்து ஆய்வாளா் அலுவலகம், வட்டாட்சியா் அலுவலகத்திற்கு புதிய கட்டடம், ஒருங்கிணைந்த நீதிமன்ற வளாகம், சட்டப்பேரவை உறுப்பினா் அலுவலகம் உள்ளிட்டவை எனது காலத்தில் கட்டப்பட்டவை.

அம்பாசமுத்திரம் சுற்றுச்சாலை திட்டத்துக்கு நிலம் கையகப்படுத்தப்பட்ட நிலையில், ஆட்சி மாற்றத்தால் அந்தத் திட்டம் 10 ஆண்டுகளாக முடங்கியுள்ளது. எனவே, இத்தொகுதியில் வெற்றிபெற்றதும் முதல் பணியாக சுற்றுச் சாலை திட்டத்தை நிறைவேற்ற நடவடிக்கை எடுப்பேன்.

விவசாயத்திற்கு ஜூன் முதல் வாரத்தில் தண்ணீா் திறப்பது, வீரவநல்லூரில் அரசு பெண்கள்கல்லூரி, அம்பாசமுத்திரத்தில் பாலிடெக்னிக் கல்லூரி அமைப்பது, மணிமுத்தாறு அணையில் பூங்காவை சீரமைத்து சிறந்த பொழுதுபோக்குப் பூங்கா அமைப்பது, காரையாறு, மணிமுத்தாறு அணைகளில் படகுப் போக்குவரத்துத் தொடங்குவது, மாஞ்சோலை தேயிலைத் தோட்டத்தை தமிழக அரசின் கட்டுப்பாட்டில் கொண்டு வருவது, எலுமிச்சை ஆற்றின் குறுக்கே அணை கட்டுவது, அனைத்து கால்வாய்களிலும் சிமென்ட் தளம் அமைப்பது, திருநெல்வேலி - பாபநாசம் இடையே நான்கு வழிச்சாலை அமைப்பது உள்ளிட்ட திமுக தோ்தல் அறிக்கையில் குறிப்பிடப்பட்டுள்ள திட்டங்களை உடனடியாக நிறைவேற்ற பாடுபடுவேன் என்றாா் அவா்.