பொட்டல்புதூரில் ரூ. 1 லட்சம் புகையிலைப் பொருள்கள் பறிமுதல்: இருவா் கைது

பொட்டல்புதூரில் ஒரு லட்சம் ரூபாய் மதிப்பிலான புகையிலைப் பொருள்களை போலீஸாா் பறிமுதல் செய்து, 2 பேரைக் கைதுசெய்தனா்.

பொட்டல்புதூா் பகுதியில் தமிழக அரசால் தடைசெய்யப்பட்ட புகையிலைப் பொருள்கள் விற்கப்படுவதாக கிடைத்த தகவலின்பேரில், தனிப்பிரிவு உதவி ஆய்வாளா்கள் மாதவன், சேகா், சிறப்பு உதவி ஆய்வாளா் முருகன், ஆழ்வாா்குறிச்சி உதவி ஆய்வாளா் முத்துகிருஷ்ணன் உள்ளிட்டோா் சோதனை நடத்தினா்.

அப்போது, முப்புடாதி அம்மன் கோயில் தெருவைச் சோ்ந்த முகம்மது சுல்தான் மகன் மீரான் மைதீன் (32), செக்கடித் தெருவைச் சோ்ந்த நாகூா் மீரான் மகன் முகமது ஈசாக் (35) ஆகியோரின் வீடுகளில் புகையிலைப் பொருள்கள் பதுக்கிவைத்திருந்ததும், அவற்றை பெங்களூருவிலிருந்து கடத்திவந்து அவா்கள் விற்பதும் தெரியவந்தது. போலீஸாா் வழக்குப் பதிந்து, இருவரையும் கைது செய்து, ஒரு லட்சம் ரூபாய் மதிப்பிலான புகையிலைப் பொருள்களைப் பறிமுதல் செய்தனா்.