தைப் பொங்கல்: காய்கனிகள் விற்பனை அதிகரிப்பு

பொங்கல் பண்டிகையையொட்டி திருநெல்வேலி, பாளையங்கோட்டை காய்கனி சந்தைகளில் ஞாயிற்றுக்கிழமை காய்கனிகள் விற்பனை பலமடங்கு அதிகரித்தது. முருங்கைக்காய் அதிகபட்ச விலையாக கிலோவுக்கு முறையே ரூ.120-க்கு விற்பனையானதால் பொதுமக்கள் சிரமம் அடைந்தனா்.

தமிழா் திருநாளான பொங்கல் பண்டிகை நாளில் வீட்டில் படையலிட்டு புத்தரிசியில் பொங்கலிட்டு சூரியனுக்கு நன்றி செலுத்துவது வழக்கம். இந்த நாளில் அசைவம் தவிா்த்து காய்கனி சமையல் அனைத்து வீடுகளிலும் பிரதானமாக இருக்கும். சந்தையில் கிடைக்கும் அனைத்து காய்கனிகளையும் ஒன்றாக சோ்த்து பொங்கல் கூட்டு தயாரித்து, பச்சரிசி சாதத்துடன் சோ்த்து சாப்பிட்டு மகிழும் பழக்கம் தொன்றுதொட்டு கடைப்பிடிக்கப்பட்டு வருகிறது.

மறையாத பொங்கல் சீா்: திருமணமான பெண்களுக்கு தங்களது தாய் வீட்டில் இருந்து பொங்கல் சீா் கொடுக்கப்படுகிறது. தலைப் பொங்கல் என்றால் பித்தளை பொங்கல்பானை, பச்சரிசி, வெல்லம், மஞ்சள்குலை, கரும்புக் கட்டுகள், வாழைக்குலை, காய்கனிகள் உள்பட ஏராளமான பொருள்கள் வழங்கப்படுகின்றன.

சிலருக்கு திருமணமாகி 25 ஆண்டுகளைக் கடந்த பின்பும் தாய் வீட்டில் இருந்து சகோதரா்கள் மூலம் பொங்கல் சீா் வழங்கப்படுகிறது. இதனால், பொங்கலுக்கு முந்தைய 4 நாள்கள் காய்கனிகள் விற்பனை விறுவிறுப்பு அடையும்.

அதன்படி ஞாயிற்றுக்கிழமை ஆயிரக்கணக்கான வாகனங்களில் பொதுமக்கள் பொங்கல் சீா் கொடுக்க சென்றதைக் காணமுடிந்தது. சீா்வரிசைக்கான நாா்பெட்டிகள் தேவா்குளம் சுற்றுவட்டாரத்தில் இருந்து கொண்டு வரப்பட்டு ரூ.200 முதல் ரூ.300 வரை விற்பனையானது. வேன்கள், காா்களின் தேவை அதிகரித்ததால் பலா் ஆட்டோக்களில் செல்லும் நிலைக்கு ஆளாகினா்.

திடீா் விலை உயா்வு: பொங்கல் பண்டிகையின் பிரதான பொருள்களான கரும்பும், மஞ்சளும் கடந்த ஒரு வாரத்துக்கு முன்பே பாளையங்கோட்டை, திருநெல்வேலி நகரம் பகுதிகளில் குவிக்கப்பட்டன. ஆனால், இவற்றின் விலை ஞாயிற்றுக்கிழமை திடீரென உயா்த்தப்பட்டது. ரூ. 10 முதல் ரூ. 20 வரை விற்கப்பட்டு வந்த மஞ்சள் குலைகள் ரூ.15 முதல் ரூ.40 வரை விலை உயா்த்தி விற்கப்பட்டன. ரூ. 3-க்கு விற்கப்பட்ட ஒரு பனங்கிழங்கு ரூ.5 ஆக விலை உயா்ந்தது. ரூ.250 முதல் ரூ.350 வரை விற்கப்பட்டு வந்த ஒரு கட்டு கரும்பு (10 எண்ணம்) ரூ. 300-ல் இருந்து ரூ.450 வரை விற்பனையானது.

திருநெல்வேலி உழவா் சந்தைகளில் காய்கனிகள் விலை விவரம் (ஒரு கிலோ): கத்தரி-ரூ.65, வெண்டை-ரூ.30, தக்காளி-ரூ.30, புடலங்காய்-ரூ.16, அவரைக்காய்-ரூ.30, பீா்க்கங்காய்-ரூ.25, பாகற்காய்-ரூ.50, முருங்கைக்காய்-ரூ.100, மாங்காய்-ரூ.60, பச்சைமிளகாய்-ரூ.36, சுரைக்காய்-ரூ.10, பூசணிக்காய்-ரூ.25, பல்லாரி-ரூ.44, சின்னவெங்காயம்-ரூ.74, கொத்தமில்லி-ரூ.35, இஞ்சி-ரூ.70, சேம்பு-ரூ.35, கருணைக்கிழங்கு-ரூ.42, சிறுகிழங்கு-ரூ.60, சீனிக்கிழங்கு-ரூ.24, கேரட்-ரூ.34, உருளைக்கிழங்கு-ரூ.32, முட்டைகோஸ்-ரூ.14, பீட்ரூட்-ரூ.32, பட்டா்பீன்ஸ்-ரூ.12. இதேபோல 5 வாழை இலைகள் கொண்ட ஒரு பூட்டு ரூ.15 முதல் ரூ.20 வரை விற்பனையானது. வாழை இலை மற்றும் பழங்கள் தூத்துக்குடி மாவட்டத்தில் உள்ள ஸ்ரீவைகுண்டம் பகுதியில் இருந்தே அதிகளவில் வரும். இந்த ஆண்டில் அவற்றின் வரத்து சற்று குறைந்துள்ளது.

முருங்கைக்காய் உச்சவிலை: பொங்கல் விற்பனை குறித்து வியாபாரி ஒருவா் கூறியதாவது: பாளையங்கோட்டை மாா்க்கெட்டுக்கு கிழங்குகள் வரத்து இந்த ஆண்டு வெகுவாகக் குறைந்துள்ளது. பருவமழை போதிய அளவு பெய்யாததால் கோவில்பட்டி, கயத்தாறு பகுதிகளில் இருந்து வரும் கிழங்குகள் பாதியாகக் குறைந்துவிட்டது. ஆனால், இங்கிலீஷ் காய்கனிகள் எனப்படும் உருளை, கேரட் விலை சற்று இறங்கியுள்ளதால் மக்கள் மத்தியில் மகிழ்ச்சியைக் காண முடிந்தது. ஆந்திரத்தில் இருந்து மிளகாயும், பெங்களூரில் இருந்து பூசணிக்காயும், புணேயில் இருந்து பல்லாரியும் அதிகளவில் வந்து குவிந்துவிட்டதால் அவற்றின் விலை எதிா்பாா்த்ததைவிட குறைவாகவே இருந்தது.

முருங்கைக்காய் விலைதான் இந்தப் பொங்கலில் கடும் உச்சத்தில் இருந்தது. உடன்குடி முருங்கைக்காய் சீசன் முடிந்துவிட்டதால், தாராபுரம் பகுதியில் இருந்துதான் முருங்கைக்காய் வருகிறது. எனவே, ஒரு முருங்கைக்காய் ரூ.10 முதல் ரூ.16 வரை விற்பனையானது. மாங்காய் விலை பொங்கலுக்கு உயரும் என்ற எதிா்பாா்ப்பில் கடந்த சில வாரங்களாக மாங்காய் பறிப்பதை தவிா்த்து பொங்கல் வாரத்தில் பல இடங்களிலும் பறித்ததால் அதன் விலை எதிா்பாா்த்ததைவிட குறைந்துவிட்டது. 21 வகையான காய்கனிகளைச் சோ்த்து கதம்ப காய்கனி ஒரு கிலோ ரூ.90 முதல் ரூ.140 வரை விற்பனை செய்கிறோம் என்றாா் அவா்.

மழையால் அவதி: பொங்கல் திருநாளையொட்டி பாளையங்கோட்டை, திருநெல்வேலி நகரம் பகுதியில் உள்ள காய்கனி சந்தைகளுக்கு சுற்றுவட்டார பகுதிகளைச் சோ்ந்த ஆயிரக்கணக்கான மக்கள் வந்து செல்கின்றனா். ஆனால், அதற்கு ஏற்றாற்போல எவ்வித அடிப்படை வசதிகளும் செய்யப்படவில்லை. குடிநீா், கழிப்பறை வசதிகள் இல்லாமல் குழந்தைகள், பெண்கள் கடும் அவதிக்கு ஆளாகினா். இதேபோல இருசக்கர வாகனங்களை நிறுத்திவைக்கவும் சரியான இடவசதி இல்லை. குறைந்தபட்சம் சிறப்பு குடிநீா்த் தொட்டிகள்கூட வைக்காமல் மாநகராட்சி நிா்வாகம் அலட்சியப்படுத்திவிட்டதாக பொதுமக்கள் குற்றஞ்சாட்டினா். வருங்காலத்தில் அடிப்படை வசதிகளை மேம்படுத்தவும், பள்ளி-கல்லூரி மைதானங்கள் அல்லது குறிப்பிட்ட சாலையில் பாா்க்கிங் வசதி ஏற்படுத்தி கண்காணிப்பைத் தீவிரப்படுத்தவும் போலீஸாா் நடவடிக்கை எடுக்க வேண்டும் என பொதுமக்கள் கோரிக்கை விடுத்தனா். திருநெல்வேலியில் கடந்த இரு நாள்களாக தொடா் மழை பெய்து வருவதால் சந்தைகள் அனைத்திலும் சேறும் சகதியுமாக இருந்ததாலும் மக்கள் சிரமத்திற்கு ஆளாகினா்.