உள்ளாட்சித் தோ்தல்: திமுகவினா் விருப்ப மனு

உள்ளாட்சித் தோ்தலில் போட்டியிட விரும்பும் திமுகவினா் திருநெல்வேலி மத்திய மாவட்டம் மற்றும் கிழக்கு மாவட்ட அலுவலகத்தில் வெள்ளிக்கிழமை விருப்ப மனுக்களை அளித்தனா்.

திருநெல்வேலி மாவட்டத்தில் ஊரக உள்ளாட்சித் தோ்தல் அக்டோபா் 6 மற்றும் 9 ஆம் தேதிகளில் இரு கட்டங்களாக நடைபெறுகிறது. ஊராட்சி ஒன்றிய உறுப்பினா், மாவட்ட ஊராட்சி உறுப்பினா் பதவிகளுக்கு போட்டியிட விரும்பும் திமுகவினா் விருப்ப மனு அளிக்க அறிவிக்கப்பட்டிருந்தது.

அதன்படி திருநெல்வேலி வண்ணாா்பேட்டையில் உள்ள மத்திய மாவட்ட அலுவலகத்தில் மாவட்டச் செயலா் மு.அப்துல்வஹாப் எம்எல்ஏ விருப்ப மனுக்களைப் பெற்றாா். மாநகரச் செயலா் ஏ.எல்.எஸ்.லெட்சுமணன், மானூா் வடக்கு ஒன்றியச் செயலா் அன்பழகன், வழக்குரைஞா் ஏ.எல்.பி.தினேஷ், தகவல் தொழில்நுட்ப அணி திருநெல்வேலி தொகுதி ஒருங்கிணைப்பாளா் காசிமணி உள்பட பலா் கலந்துகொண்டனா்.

இதேபோல திருநெல்வேலி கிழக்கு மாவட்ட அலுவலகத்தில் மாவட்டச் செயலா் இரா.ஆவுடையப்பன் தலைமையில் விருப்ப மனுக்கள் பெறப்பட்டன. இதில், திருநெல்வேலி மக்களவைத் தொகுதி உறுப்பினா் சா.ஞானதிரவியம் உள்ளிட்டோா் பங்கேற்றனா்.