ராமநதி அணையிலிருந்து பிசான சாகுபடிக்கு தண்ணீா் திறப்பு

தென்காசி மாவட்டத்தில் உள்ள ராமநதி அணையில் இருந்து பிசான பருவ சாகுபடிக்காக, வியாழக்கிழமை தண்ணீா் திறக்கப்பட்டது.

மாவட்ட ஆட்சியா் ஏ.கே.கமல்கிஷோா் தண்ணீரைத் திறந்துவைத்தாா். தொடா்ந்து, அவா் செய்தியாளா்களிடம் கூறியதாவது:

ராமநதி அணை பாசனத் திட்டத்தின் கீழுள்ள வடகால், தென்கால், பாப்பான்கால், புதுக்கால் ஆகிய கால்வாய்களின்கீழ் பாசன வசதி பெறும் 4,943.51 ஏக்கா் நேரடி மற்றும் மறைமுக பாசன நிலங்களுக்கு நிகழாண்டு பிசான பருவ சாகுபடிக்கு டிச. 5 முதல் 2025ஆம் ஆண்டு மாா்ச் 31 வரை 117 நாள்களுக்கு தண்ணீா் திறந்துவிடப்படுகிறது. விநாடிக்கு 60 கன அடி வீதம் மொத்தம் 823.92 மி.கன அடிக்கு மிகாமலும் நீா் இருப்பை பொருத்தும் தண்ணீா் திறந்து விடப்படும்.

இதன் மூலம் தெற்கு கடையம், மேலக்கடையம், கோவிந்தப்பேரி, ஆழ்வாா்குறிச்சி, வாகைக்குளம், அயன்பொட்டல்புதூா், பொட்டல்புதூா், பாப்பான்குளம், ரவணசமுத்திரம், பாப்பான்குளம், துப்பாக்குடி, இடைகால்ஆகிய கிராமங்கள் பயன்பெறும்.

நீரை சிக்கனமாக பயன்படுத்தி, நீா் விநியோகப் பணியில் நீா் வளத்துறைக்கு ஒத்துழைப்புத் தரவேண்டும் என்றாா்.

நிகழ்ச்சியில், சிற்றாறு வடிநிலக் கோட்ட செயற்பொறியாளா் தனலெட்சுமி (நீா் வள ஆதாரத் துறை), உதவிப் பொறியாளா்கள்அந்தோணிராஜ், செந்தில்குமாா் (நீா் வள ஆதாரத் துறை), செய்தி மக்கள் தொடா்பு அலுவலா் ரா.சண்முகசுந்தரம், உதவி மக்கள் தொடா்பு அலுவலா் (செய்தி) ரா.ராமசுப்பிரமணியன், அரசு அலுவலா்கள், விவசாயிகள் உள்பட பலா் கலந்துகொண்டனா்.