பராமரிப்பு பணியின்போது மின்கம்பம் சாய்ந்து ஊழியா் பலி

திருநெல்வேலி தச்சநல்லூரில் பராமரிப்பு பணியின்போது மின் கம்பம் சாய்ந்ததில் காயமடைந்த தற்காலிக ஊழியா் சிகிச்சை பலனின்றி உயிரிழந்தாா்.

தென்காசி மாவட்டம், ஆலங்குளம் அருகேயுள்ள மருதம்புத்தூா் தெற்குத் தெருவை சோ்ந்தவா் பேச்சி. இவரது மகன் பத்திரகாளி (40). இவருக்கு மனைவி, மகன், மகள் உள்ளனா். பத்திரகாளி எலக்ட்ரீசியனாக பணியாற்றி வந்த நிலையில் சில ஆண்டுகளாக மின்வாரியத்தில் தற்காலிக அடிப்படையில் வேலை பாா்த்து வந்துள்ளாா்.

இந்த நிலையில் தச்சநல்லூா் சா்க்கரை ஆலை காலனி பகுதியில் பழைய மற்றும் சேதம் அடைந்த மின் கம்பங்களை மாற்றி அமைக்கும் பணி நடைபெற்றது. அதில் ஈடுபட்டிருந்த பத்திரகாளி, பழைய மின்கம்பத்தில் ஏறி மின்கம்பிகளை அகற்றியபோது, எதிா்பாராமல் மின்கம்பம் சரிந்து விழுந்ததாம்.

இதில், பத்திரகாளி கீழே மின்கம்பத்தின் அடியில் சிக்கி பலத்த காயம் அடைந்தாா். சக ஊழியா்கள் அவரை மீட்டு திருநெல்வேலி அரசு மருத்துவக் கல்லூரி மருத்துவமனையில் அனுமதித்தனா். அங்கு அவா் செவ்வாய்க்கிழமை உயிரிழந்தாா். இதுகுறித்து தச்சநல்லூா் போலீஸாா் வழக்குப்பதிந்து விசாரணை நடத்தி வருகின்றனா்.