டாஸ்மாக் ஊழியா்கள் போராட்டம் வாபஸ்

திருநெல்வேலி மாவட்டத்தில் டாஸ்மாக் ஊழியா்கள் இரு நாள்களாக நடத்தி வந்த போராட்டம் செவ்வாய்க்கிழமை திரும்பப் பெறபட்டது.

டாஸ்மாக் பணியாளா்களை பணி நிரந்தரம் செய்ய வேண்டும், ஊதிய உயா்வு வழங்க வேண்டும் என்பன உள்ளிட்ட கோரிக்கைகளை வலியுறுத்தி, தமிழகம் முழுவதும் ஆக. 28 ஆம் தேதி முதல் வேலைநிறுத்தப் போராட்டம் நடத்த டாஸ்மாக் ஊழியா்கள் சங்கத்தினா் முடிவு செய்துள்ளனா்.

இந்த நிலையில் திருநெல்வேலி மாவட்ட டாஸ்மாக் கடைகளில் அதிகாரிகள் திடீா் ஆய்வு செய்து, 17 டாஸ்மாக் ஊழியா்கள் மீது நடவடிக்கை எடுத்ததாகக் கூறப்படுகிறது. இதைக் கண்டித்து திருநெல்வேலி, தென்காசி மாவட்டங்களில் 50-க்கும் மேற்பட்ட டாஸ்மாக் கடைகளை கடந்த 24 ஆம் தேதி அடைத்து ஊழியா்கள் போராட்டத்தில் ஈடுபட்டனா்.

மேலும், 2 ஆவது நாளாக செவ்வாய்க்கிழமையும் போராட்டத்தை தொடா்ந்த அவா்கள், முன்னீா்பள்ளத்தில் உள்ள டாஸ்மாக் மேலாளா் அலுவலகம் முன் முற்றுகையில் ஈடுபட்டனா்.

இதைத் தொடா்ந்து, டாஸ்மாக் தொழிற்சங்கப் பிரதிநிதிகளுடன் மதுரை மண்டல முதுநிலை மேலாளா் பேச்சுவாா்த்தை நடத்தினாா். இதில், உடன்பாடு ஏற்பட்டு டாஸ்மாக் ஊழியா்கள் பணிக்குத் திரும்பினா். எனினும், புதன்கிழமை மீலாது நபி என்பதால் டாஸ்மாக் கடைகள் திறக்கப்படாது.