தீபாவளி: மேலப்பாளையம் சந்தையில் ஆடுகள், கோழிகள் விற்பனை அதிகரிப்பு

தீபாவளி பண்டிகையையொட்டி மேலப்பாளையம் சந்தையில் ஆடுகள், கோழிகள் விற்பனை செவ்வாய்க்கிழமை அதிகரித்தது.

நாடு முழுவதும் தீபாவளி பண்டிகை இம் மாதம் 8 ஆம் தேதி கொண்டாடப்பட உள்ளது. இந்த நாளில் புத்தாடைகள் அணிந்து, பட்டாசு வெடித்து கொண்டாடுவதோடு பெரும்பாலான வீடுகளில் அசைவ உணவுகள் சமைத்து உண்பது வழக்கமாகும்.

இதையொட்டி கடந்த இரு வாரங்களாக கால்நடை சந்தைகளில் வியாபாரிகள் அதிகளவில் ஆடுகளை வாங்கிச் சென்ற வண்ணமாக உள்ளனா்.

வாரம்தோறும் செவ்வாய்க்கிழமை நடைபெறும் மேலப்பாளையம் சந்தையில் ஆயிரக்கணக்கில் ஆடுகள் கொண்டு வரப்பட்டிருந்தன. திருநெல்வேலி, தூத்துக்குடி, தென்காசி, விருதுநகா், அருப்புக்கோட்டை, தேனி உள்ளிட்ட பல்வேறு இடங்களை சோ்ந்த வியாபாரிகள் ஆடுகளோடு சந்தையில் குவிந்தனா்.

வெள்ளாடுகள் மற்றும் செம்மறியாடுகள் ரூ.20 ஆயிரம் தொடங்கி ரூ.50 ஆயிரம் வரை விற்பனை செய்யப்பட்டன. சுமாா் ரூ.2 கோடிக்கு மேல் வா்த்தகம் நடைபெற்றது. இதேபோல, நாட்டுக்கோழிகள், வான்கோழிகள், வாத்துகள் விற்பனையும் அதிகரித்தது. கோழிகள் கிலோ ரூ.700, கூஸ் வாத்து ஜோடி ரூ.5 ஆயிரம், சேவல் கிலோ ரூ.250 வீதம் தரத்திற்கு ஏற்ப விற்பனை செய்யப்பட்டன.