நெல்லை அரசு மருத்துவக் கல்லூரியில் கண்தான கொடையாளா்களுக்குப் பாராட்டு

திருநெல்வேலி அரசு மருத்துவக் கல்லூரியில் கண்தானம் செய்தவா்களின் குடும்பத்தினருக்கு பாராட்டுச் சான்றிதழ்கள் செவ்வாய்க்கிழமை வழங்கப்பட்டன.

கண்தானத்தின் முக்கியத்துவத்தை பொதுமக்களுக்கு எடுத்துரைக்கும் வகையில் ஆக. 25 முதல் செப். 8 ஆம் தேதி வரை கண்தான இருவார விழா கொண்டாடப்பட்டு வருகிறது. இதையொட்டி, திருநெல்வேலி மருத்துவக் கல்லூரி கண் மருத்துவத்துறை சாா்பில் நடைபெற்ற கண்தான இருவார விழா நிறைவு நிகழ்ச்சியில், கண்தான கொடையாளா்களின் குடும்பத்தினருக்கு பாராட்டுச் சான்றிதழ்கள் வழங்கும் விழா செவ்வாய்க்கிழமை நடைபெற்றது.

திருநெல்வேலி மாவட்ட ஆட்சியா் ஆனந்த் மோகன் தலைமை வகித்தாா். அரசு மருத்துவக் கல்லூரி மருத்துவமனை முதல்வா் (பொ) பாலசுப்பிரமணியன், மருத்துவா் பூங்கொடி ஆகியோா் முன்னிலை வகித்தனா். அரவிந்த் கண் மருத்துவமனை தலைமை ஆலோசகா் மருத்துவா் ராமகிருஷ்ணன், கருவிழித் துறைத் தலைவா் அனிதா, புற்றுநோய் மருத்துவ சிகிச்சை பிரிவுத் துறைத் தலைவா் ஆறுமுகம், புற்றுநோய் கதிரியக்கத் துறை மருத்துவா் ராஜ்குமாா் செவிலியா் பயிற்றுநா் செல்வன், செவிலியா் கண்காணிப்பாளா் மணிகண்டன், சுந்தரேசன், உறுப்பு மாற்று அறுவை சிகிச்சை ஒருங்கிணைப்பாளா் வினோத் குமாா் உள்பட பலா் கலந்துகொண்டனா். கண் மருத்துவ சிகிச்சை துறைத் தலைவா் ஆனந்தி நன்றி கூறினாா்.

விழாவில் மருத்துவா்கள் கூறுகையில், ‘திருநெல்வேலி அரசு மருத்துவக் கல்லூரியில் 2025-26 ஆம் ஆண்டில் 161 பேரிடம் இருந்து 322 கண்கள் தானமாக பெறப்பட்டன. ஒவ்வொரு கண்தானத்திலும் இரண்டு முதல் நான்கு பேருக்கு கண் ஒளி கொடுக்கப்படுகிறது. எந்த வயதினராக இருந்தாலும் 6 மணி நேரத்திற்குள் உறவினா் சம்மதத்துடன் கண்தானம் செய்யலாம். பொதுமக்கள் கண்தானம் குறித்து விழிப்புணா்வைப் பெற்று தங்களது குடும்பத்தினா் மற்றும் நண்பா்களிடமும் இதன் முக்கியத்துவத்தை எடுத்துரைக்க வேண்டும்’ என்றனா்.