லாரி மோதி இளைஞர் சாவு

தூத்துக்குடியில் திங்கள்கிழமை மோட்டார் சைக்கிளில் சென்ற இளைஞர்  லாரி மோதியதில் உயிரிழந்தார்.

திருநெல்வேலி மாவட்டம்,  சங்கரன்கோவில் அருகேயுள்ள வடக்கு குருவிக்குளம், வடக்கு ரதவீதியைச் சேர்ந்த ஜெயபிரகாஷ் மகன் சதீஷ்போஸ் (21). இவர், தூத்துக்குடியில் உள்ள தனியார் மோட்டார் சைக்கிள் விற்பனை நிலையத்தில் ஊழியராக பணிபுரித்து வந்தார்.

இவர், சிப்காட் பகுதியில் உள்ள தனது நண்பரை பார்ப்பதற்காக மோட்டார் சைக்கிளில் சென்று கொண்டிருந்தாராம். அப்போது, மீளவிட்டான் பாலம் அருகே அந்த வழியாகச் சென்ற லாரி எதிர்பாராதவிதமாக மோதியதில் சதீஷ்போஸ் சம்பவ இடத்திலேயே உயிரிழந்தார்.

இதில், இவர் மீது மோதிய லாரி, அருகிலுள்ள பள்ளத்தில் கவிழ்ந்தது. இதில், லாரி ஓட்டுநருக்கு லேசான காயம் ஏற்பட்டது. இதுகுறித்து, சிப்காட் போலீஸார் வழக்குப் பதிந்து விசாரணை நடத்தி வருகின்றனர்.