கோவில்பட்டி அருகே மேல்நிலை நீர்தேக்கத் தொட்டி திறப்பு

கோவில்பட்டியையடுத்த குலசேகரபுரம் என்ற பெருமாள்பட்டி ஊராட்சியில் புதிதாக கட்டப்பட்ட மேல்நிலை நீர்தேக்கத் தொட்டி திறப்பு விழா சனிக்கிழமை நடைபெற்றது.

மாநிலங்களவை உறுப்பினர் ராஜாவின் தொகுதி மேம்பாட்டு நிதியிலிருந்து ரூ.15லட்சம் மதிப்பீட்டில் 1 லட்சம் லிட்டர் கொள்ளளவு கொண்ட மேல்நிலை நீர்தேக்கத் தொட்டி பெருமாள்பட்டி ஊராட்சியில் கட்டப்பட்டது.

இதையடுத்து சனிக்கிழமை ராஜா எம்.பி. மேல்நிலை நீர்தேக்கத் தொட்டியை திறந்துவைத்து மக்கள் பயன்பாட்டிற்கு அர்ப்பணித்தார். இந்நிகழ்ச்சிக்கு ஊராட்சி மன்றத் தலைவி வசந்தா தேவி தலைமை வகித்தார். முன்னாள் சட்டப்பேரவை உறுப்பினர்கள் அய்யலுசாமி, ராஜேந்திரன் ஆகியோர் முன்னிலை வகித்தனர்.

இதில், அனைத்திந்திய இளைஞர் பெருமன்ற மாநிலச் செயலர் பாலமுருகன், நிர்வாகக் குழு உறுப்பினர்  முத்துக்குமார், விவசாயிகள் சங்க வட்டச் செயலர் லெனின்குமார், இந்திய கம்யூனிஸ்ட் கட்சியின் வட்டச் செயலர் சேதுராமலிங்கம், எட்டயபுரத்தைச் சேர்ந்த கிருஷ்ணமூர்த்தி, முன்னாள் ஊராட்சி மன்றத் தலைவர் நல்லுசாமி உள்ளிட்ட பலர் கலந்துகொண்டனர்.