கோயில் இடத்தில் உள்ள ஆக்கிரமிப்பு  கடையை அகற்றக் கோரி ஆர்ப்பாட்டம்

கோவில்பட்டியில் இந்து சமய அறநிலையத் துறைக்குப் பாத்தியப்பட்ட இடத்தில் வைக்கப்பட்டுள்ள அசைவக் கடையை உடனடியாக அகற்றக் கோரி பாஜகவினர் செவ்வாய்க்கிழமை ஆர்ப்பாட்டத்தில் ஈடுபட்டனர். 
கோவில்பட்டி அருள்மிகு செண்பகவல்லி அம்பாள் உடனுறை பூவனநாத சுவாமி கோயிலுக்குப் பாத்தியப்பட்ட எட்டயபுரம் சாலையில் உள்ள வணிக வளாகத்தில் அண்மையில் அசைவக் கடை ஒன்று திறக்கப்பட்டது. 
இதையடுத்து, இந்து சமய அறநிலையத் துறைக்குச் சொந்தமான இடத்தில் ஆகம விதிமுறை மற்றும் தமிழ்நாடு இந்து அறநிலையத் துறை சட்டத்தை மீறி, அசைவக் கடை வைப்பதற்கு அனுமதி வழங்கியுள்ளதைக் கண்டித்தும், அனுமதியை உடனடியாக ரத்து செய்ய வேண்டும் என்பன உள்ளிட்ட பல்வேறு கோரிக்கைகளை வலியுறுத்தி பாஜக மாவட்டச் செயலர் சிவந்தி நாராயணன் தலைமையில், ஒன்றிய பொதுச்செயலர்கள் மாரிமுத்து, நகரப் பொதுச்செயலர்கள் முனியராஜ்,  தினேஷ்குமார் ஆகியோர் முன்னிலையில் பாஜகவினர் செண்பகவல்லி அம்மன் கோயில் முன்பு ஆர்ப்பாட்டத்தில் ஈடுபட்டனர். 
பின்னர் கோரிக்கை மனுவை கோயில் அலுவலரிடம் அளித்தனர். கோயில் நிர்வாகம் சார்பில் அனுமதியின்றி வைக்கப்பட்ட அசைவக் கடை உடனடியாக அகற்றப்பட்டுவிட்டதாக தெரிவித்ததையடுத்து பாஜகவினர் கலைந்து சென்றனர். 
இதில், ஒன்றியப் பொருளாளர் ராஜேந்திரன், ஒன்றியத் துணைத் தலைவர் மாரிமுத்து மற்றும் பாஜக நிர்வாகிகள் உள்ளிட்ட பலர் கலந்து கொண்டனர்.