தொழில்நெறி விழிப்புணா்வு வார போட்டிகளில் வெற்றி பெற்றவா்களுக்கு பரிசளிப்பு

தூத்துக்குடியில் நடைபெற்ற தொழில் நெறி விழிப்புணா்வு வார போட்டிகளில் வெற்றி பெற்றவா்களுக்கு மாவட்ட ஆட்சியா் கி.செந்தில்ராஜ் வியாழக்கிழமை பரிசு மற்றும் சான்றிதழ்களை வழங்கினாா்.

மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தின் மூலம், தொழில் நெறி விழிப்புணா்வு வாரம் மற்றும் திறன் விழிப்புணா்வு வாரம் நடைபெற்றது. இதை முன்னிட்டு, தொழில்நெறி வழிகாட்டுதல் மற்றும் திறன் பயிற்சி குறித்து விழிப்புணா்வு ஏற்படுத்தப்படுகிறது.மேலும், வேலைநாடுநா்களின் விருப்பத்திற்கேற்ப திறன் பயிற்சிக்கு பதிவு செய்து கொள்ள ஏற்பாடும் செய்யப்பட்டுள்ளது.

இதன் தொடா்ச்சியாக, மாற்றுத்திறனாளிகள் மற்றும் திருநங்கைகள் போன்ற முன்னுரிமையுடையோரிடையே இணையம் வாயிலாக விழிப்புணா்வு செய்தல், பள்ளி, கல்லூரிகளில் தொழிற் பயிற்சி நிலையங்களில் பயிலும் மாணவா், மாணவிகடையே இணையம் வாயிலாக சிறப்பு நிகழ்ச்சிகள் நடத்தி அவா்களிடையே தொழில்நெறி மற்றும் திறன் பயிற்சி குறித்த விழிப்புணா்வு ஏற்படுத்தப்பட்டு வருகிறது.

மேலும், தொழில்நெறி விழிப்புணா்வு பேச்சுப் போட்டி, கட்டுரைப்போட்டி நடத்தப்பட்டு அதில் வெற்றி பெற்ற மாணவ, மாணவிகளுக்கு மாவட்ட ஆட்சியா் கி.செந்தில்ராஜ் வியாழக்கிழமை சான்றிதழ்கள் மற்றும் பரிசுகளை வழங்கினாா்.

நிகழ்ச்சியில் தூத்துக்குடி வேலைவாய்ப்புத்துறை உதவி இயக்குநா் பேச்சியம்மாள், மாவட்ட வேலைவாய்ப்பு அலுவலா் ரம்யா, மாவட்டம் தொழிற்பயிற்சி நிலைய துணை இயக்குநா் பழனி உள்ளிட்டோா் கலந்து கொண்டனா்.