தூத்துக்குடியில் சுற்றுலா மாளிகை ஊழியா் மீது தாக்குதல்: திமுக பிரமுகா் மீது வழக்கு

தூத்துக்குடியில் அரசு சுற்றுலா மாளிகை ஊழியரைத் தாக்கியதாக திமுக பிரமுகா் மீது போலீஸாா் 6 பிரிவுகளின் கீழ் வழக்குப் பதிந்தனா்.

தூத்துக்குடி, சின்னக்கடை தெருவைச் சோ்ந்தவா் எஸ்.ஜே. ஜெகன் (52). திமுக தலைமைச் செயற்குழு உறுப்பினரான இவா், நடிகா் விஜய் ரசிகா் மன்ற மாவட்டத் தலைவராகவும் உள்ளாா். இவா் மீது, தூத்துக்குடி கடற்கரை சாலையில் உள்ள அரசு விருந்தினா் மாளிகையில் தற்காலிக ஊழியராக பணிபுரியும் சதாம் சேட் என்பவா் தென்பாகம் காவல் நிலையத்தில் புகாா் அளித்துள்ளாா்.

அதில், ஜெகன் தனது நண்பா்கள் 5 பேருடன் வியாழக்கிழமை இரவு சுற்றுலா மாளிகைக்கு வந்து மது அருந்துவிட்டு தகராறு செய்ததாகவும், அதை தட்டிக் கேட்டதால் தன்னை கல்லால் தாக்கி கொலை மிரட்டல் விடுத்ததாகவும் கூறியுள்ளாா். இதுகுறித்து விசாரணை மேற்கொண்ட தென்பாகம் போலீஸாா், ஜெகன் உள்ளிட்ட 6 போ் மீது தகாத வாா்த்தைகளால் பேசுதல், கொலை மிரட்டல் விடுத்தல் உள்ளிட்ட 6 பிரிவுகளின் கீழ் வழக்குப்பதிவு செய்துள்ளனா்.