த.வெள்ளையன் உடல் அடக்கம் அமைச்சா்கள், அரசியல் கட்சியினா் அஞ்சலி

உடல்நலக்குறைவால் சென்னையில் கடந்த 10ஆம் தேதி காலமான தமிழ்நாடு வணிகா் சங்கங்களின் பேரவைத் தலைவா் த.வெள்ளையன் உடல், திருச்செந்தூா் அருகே பிச்சிவிளையில் உள்ள அவரது தோட்டத்தில் வியாழக்கிழமை மாலை நல்லடக்கம் செய்யப்பட்டது.

முன்னதாக, பிச்சிவிளையில் உள்ள திருமண மண்டபத்தில் வைக்கப்பட்டிருந்த அவரது உடலுக்கு, அமைச்சா்கள் அனிதா ஆா்.ராதாகிருஷ்ணன், பெ.கீதா ஜீவன், முன்னாள் எம்.பி. ஹெலன் டேவிட்சன், அதிமுகவைச் சோ்ந்த முன்னாள் அமைச்சா்கள் எஸ்.பி.சண்முகநாதன், செல்லபாண்டியன், திருநெல்வேலி மக்களவைத் தொகுதி உறுப்பினா் ராபா்ட் புரூஸ், ஸ்ரீவைகுண்டம் எம்எல்ஏ ஊா்வசி எஸ்.அமிா்தராஜ் உள்பட அரசியல் கட்சிகளின் நிா்வாகிகள், வியாபாரிகள் சங்க நிா்வாகிகள் மற்றும் பொதுமக்கள் அஞ்சலி செலுத்தினா்.

கடையடைப்பு: த.வெள்ளையன் மறைவையொட்டி, திருச்செந்தூா், பரமன்குறிச்சி, உடன்குடி, மெஞ்ஞானபுரம் மற்றும் சுற்று வட்டாரப் பகுதியில் உள்ள கடைகள் வியாழக்கிழமை அடைக்கப்பட்டிருந்தன.

போராட்டம்: த.வெள்ளையன் உடலை அரசு மரியாதையுடன் நல்லடக்கம் செய்ய வேண்டும் என வலியுறுத்தி, பிச்சிவிளையில் வணிகா்கள் திடீரென சாலையில் அமா்ந்து போராட்டத்தில் ஈடுபட்டனா். அவா்களிடம் திருச்செந்தூா் தாலுகா போலீஸ் இன்ஸ்பெக்டா் சுந்தரமூா்த்தி உள்ளிட்ட போலீஸாா் பேச்சுவாா்த்தை நடத்தினா். இதையடுத்து சிறிது நேரம் நடந்த போராட்டம் கைவிடப்பட்டது.