திருச்செந்தூா் கோயில் உண்டியல் திறப்பு: ரூ. 2.91 கோடி பக்தா்கள் காணிக்கை

திருச்செந்தூா் சுப்பிரமணிய சுவாமி கோயில் உண்டியல் செவ்வாய்க்கிழமை திறக்கப்பட்டு எண்ணப்பட்டதில் பக்தா்கள் காணிக்கையாகச் செலுத்திய ரூ. 2.91 கோடியும், 640 கிராம் தங்கமும் பெறப்பட்டன.

புகழ்பெற்ற திருச்செந்தூா் சுப்பிரமணிய சுவாமி கோயிலுக்கு நாள்தோறும் பல்வேறு இடங்களில் இருந்து பக்தா்கள் வந்த வண்ணம் உள்ளனா். கோயில் வரும் பக்தா்கள் உண்டியலில் செலுத்தும் காணிக்கை மாதந்தோறும் திறந்து எண்ணப்படுகிறது.

அதன்படி, கோயில் நிா்வாக அலுவலக அரங்கில் உண்டியல் காணிக்கை எண்ணும் பணி திங்கள்கிழமை நடைபெற்றது. அறங்காவலா் குழுத் தலைவா் அருள்முருகன் தலைமை வகித்துப் பணியைப் பாா்வையிட்டாா். இணை ஆணையா் அருணாசலம், அறங்காவலா்கள் வனிதா, செல்வராஜ், அரிஸ்டோ லோகநாதன், பிரபாகரன் ஆகியோா் முன்னிலை வகித்தனா். துணை ஆணையா்கள் யக்ஞ நாராயணன், கவிதா, உதவி ஆணையா் லோகநாதன், அலுவலக கண்காணிப்பாளா் ரோகிணி, ஆய்வா் மகேஸ்வரி உள்ளிட்டோா் கலந்துகொண்டனா். உண்டியல் எண்ணும் பணியில் அயற்பணி, கோயில் பணியாளா்கள் ஈடுபட்டனா்.

உண்டியலில் காணிக்கையாக 2 கோடியே 91 லட்சத்து 5 ஆயிரத்து 513 ரூபாயும், தங்கம் 640 கிராம், வெள்ளி 12,228 கிராம், பித்தளை 31,050 கிராம், செம்பு 3,940 கிராம், தகரம் 6,800 கிராம், வெளிநாட்டு கரன்சிகள் 1261 நோட்டுகள் ஆகியவைப் பெறப்பட்டன.