தசரா திருவிழா எதிரொலி: தூத்துக்குடியில் மீன்கள் விலை சரிவு

தூத்துக்குடி மாவட்டம், குலசேகரன்பட்டினம் முத்தாரம்மன் கோயில் தசரா திருவிழா ஞாயிற்றுக்கிழமை கொடியேற்றத்துடன் தொடங்கவுள்ள நிலையில், தூத்துக்குடி திரேஸ்புரம் நாட்டுப் படகு மீன்பிடித் துறைமுகத்தில் மீன்களை வாங்க பொதுமக்களின் வருகை குறைந்ததால், மீன்களின் விலை சரிவைக் கண்டது.

திரேஸ்புரம் நாட்டுப் படகு மீன்பிடித் துறைமுகத்திலிருந்து 100-க்கும் மேற்பட்ட நாட்டுப் படகுகளில் மீனவா்கள் ஆழ்கடலுக்குச் சென்று மீன்பிடித்து வருகின்றனா். ஆழ்கடல் மீன்பிடிப்புக்குச் சென்ற மீனவா்கள் சனிக்கிழமை கரை திரும்பினா்.

இதனிடையே, குலசேகரன்பட்டினம் முத்தாரம்மன் கோயில் தசரா திருவிழாவை முன்னிட்டு ஏராளமான பக்தா்கள் மாலை அணிந்து விரதம் இருந்து வருவதால், திரேஸ்புரம் மீன்பிடித் துறைமுகத்தில் மீன்களை வாங்குவதற்கான கூட்டம் குறைவாகக் காணப்பட்டது.

இதன் எதிரொலியாக, வழக்கத்தைவிட மீன்களின் விலை குறைந்தது. விளைமீன், ஊழி, பாறை உள்ளிட்ட மீன் வகைகள் கிலோ ரூ.300 முதல் ரூ.400 வரையிலும், நண்டு கிலோ ரூ.600 வரையிலும், கேரை மீன் கிலோ ரூ.230 வரையிலும் விற்பனை செய்யப்பட்டன.