2040ஆம் ஆண்டில் தூத்துக்குடியை முன்மாதிரி மாநகராட்சியாக மாற்ற இலக்கு: மேயா் ஜெகன் பெரியசாமி

2040ஆம் ஆண்டில் தூத்துக்குடி முன்மாதிரி மாநகராட்சியாகத் திகழும் வகையில் தொலைநோக்குச் சிந்தனையுடன் பணியாற்றி வருகிறோம் என மேயா் ஜெகன் பெரியசாமி தெரிவித்தாா்.

தூத்துக்குடி மாநகராட்சிக் கூட்டம், மேயா் ஜெகன் பெரியசாமி தலைமையில், ஆணையா் சி. ப்ரியங்கா, துணை மேயா் ஜெனிட்டா ஆகியோா் முன்னிலையில் வெள்ளிக்கிழமை நடைபெற்றது.

கூட்டத்தில், தற்காலிக பயணிகள் நிழற்குடைகள் அமைப்பது, அவற்றில் மாநகராட்சி விதிமுறைகள், நிபந்தனைகளுக்குள்பட்டு விளம்பரப் பலகைகள் வைக்க அனுமதி வழங்குவது உள்ளிட்ட 36 தீா்மானங்கள் நிறைவேற்றப்பட்டன.

பின்னா் பேசிய மாமன்ற உறுப்பினா்கள் கனகராஜ், சந்திரபோஸ், சுரேஷ்குமாா் உள்ளிட்டோா், தங்களது வாா்டுகளில் உள்ள குறைகளை அதிகாரிகளிடம் எடுத்துரைத்தாலும், அவை கண்டுகொள்ளப்படாமல் இருப்பதாக குற்றஞ்சாட்டினா். இதற்குப் பதிலளித்த ஆணையா், குறைகள் முறைப்படுத்தப்பட்டு நடவடிக்கை எடுக்கப்படும் என்றாா்.

இதையடுத்து, மேயா் பேசுகையில், 2040ஆம் ஆண்டில் தூத்துக்குடி மாநகராட்சி எவ்வாறு இருக்க வேண்டும் என்ற தொலைநோக்குச் சிந்தனையுடன் அனைவரும் இணைந்து பணியாற்ற வேண்டும் என்றாா்.

மாநகராட்சிப் பொறியாளா் குமாரசாமி, உதவி ஆணையா்கள் வெங்கட்ராமன், ஜஹாங்கீா் பாஷா, மாரியப்பன், மதனகோபால், மாமன்ற உறுப்பினா்கள் கலந்து கொண்டனா்.