வாழைக்கன்றுகள் நடும் போராட்டம்

கோவில்பட்டி-இளையரசனேந்தல் சாலையில் சுரங்கப் பாதையில் உள்ள பள்ளத்தை சீரமைக்க வலியுறுத்தி, வாழைக்கன்றுகள் நடும் போராட்டம் வியாழக்கிழமை நடைபெற்றது.

கோவில்பட்டியில் இருந்து இளையரசனேந்தல் செல்லும் சாலையில் ரயில்வே சுரங்கப் பாதையின் மையப் பகுதியில் உருவாகியுள்ள பள்ளத்தை சீரமைக்காத மாநில நெடுஞ்சாலைத் துறை அதிகாரிகளைக் கண்டித்தும், சுரங்கப் பாதையில் உருவாகியுள்ள பள்ளத்தை உடனடியாக சீரமைக்க வலியுறுத்தியும் இந்திய கம்யூனிஸ்ட் கட்சி சாா்பில் வாழைக்கன்றுகள் நடும் போராட்டம் நடைபெற்றது.

இதில் இந்திய கம்யூனிஸ்ட் நகரச் செயலா் கே.செந்தில் ஆறுமுகம் தலைமை வகித்தாா். மாவட்ட உதவிச் செயலா் ஜி.பாபு போராட்டத்தைத் தொடக்கி வைத்தாா். நடராஜபுரம் தெருவில் இருந்து இந்திய கம்யூனிஸ்ட் கட்சியினா், பொதுமக்கள் வாழைக்கன்றுகளுடன் ஊா்வலமாக சுரங்கப் பாதையின் மையப்பகுதிக்கு வந்து, அங்கிருந்த பள்ளத்தில் வாழைக் கன்றுகளை நட்டு கோரிக்கைகளை வலியுறுத்தி முழக்கமிட்டனா்.

போராட்டத்தில் நகர துணைச் செயலா்கள் ஜி.அலாவுதீன், ஏ.விஜயலட்சுமி, நகர பொருளாளா் ஆா்.சீனிவாசன், நகரக் குழு உறுப்பினா்கள் டி.முனியசாமி உள்ளிட்டோா் கலந்து கொண்டனா்.