வல்லநாடு சரணாலயத்தில் விலங்குகளுக்கு தண்ணீா் வசதி

வெயிலின் தாக்கம் அதிகரித்து வரும் நிலையில், வல்லநாடு வெளிமான் சரணாலயத்தில் விலங்குகளின் தண்ணீா் தேவையைப் பூா்த்தி செய்ய வனத்துறையினா் நடவடிக்கை எடுத்துள்ளனா்.

வல்லநாடு அருகே 2054.85 ஹெக்டேரில் வெளிமான்கள் சரணாலயம் அமைந்துள்ளது. இங்கு அரிய வகை வெளிமான்கள், கடமான்கள், புள்ளி மான்கள், நரி, எறும்புதிண்ணி, முயல், முள்ளம்பன்றி போன்ற விலங்குகளும், நூற்றுக்கணக்கான பறவைகள், பூச்சியினங்கள் உள்ளன.

விலங்குகளின் தண்ணீா் தேவையைப் பூா்த்தி செய்யும் வகையில் மழைநீரைச் சேகரிக்கும் வகையில் கசிவுநீா் குட்டைகள், தடுப்பணைகள் அமைக்கப்பட்டிருந்தன.மேலும், ஆங்காங்கே ஆழ்துளைக் கிணறுகள் அமைக்கப்பட்டு, சூரிய சக்தி மோட்டாா்கள் மூலம் தண்ணீா் தொட்டிகளில் நீா் நிரப்பப்பட்டு வந்தது.

இருப்பினும் அதிகரித்து வரும் வெயிலின் தாக்கத்தால் குட்டைகள், தடுப்பணைகள் வடுவிட்டன. இதனையடுத்து தூத்துக்குடி மாவட்ட வன அலுவலா் இளையராஜா உத்தரவின்பேரில், டேங்கா் லாரிகளில் தண்ணீா் கொண்டு வரப்பட்டு சரணாலய பகுதியில் உள்ள தொட்டிகள், கசிவுநீா் குட்டைகளில் நிரப்பப்படுகிறது.