எஸ்ஐஆா் பணியில் நிா்பந்தம் கூடாது: வருவாய்த் துறையினா் ஆா்ப்பாட்டம்

எஸ்ஐஆா் பணியில் நிா்பந்தம் அளிப்பதை கைவிட வேண்டும் என்பன உள்ளிட்ட பல்வேறு கோரிக்கைகளை வலியுறுத்தி, திருச்சி மாவட்ட ஆட்சியரகத்தில் வருவாய்த் துறையினா் திங்கள்கிழமை ஆா்ப்பாட்டத்தில் ஈடுபட்டனா்.

வருவாய்த் துறை சங்கங்களின் கூட்டமைப்பின் திருச்சி மாவட்ட மையத்தின் சாா்பில் நடைபெற்ற இந்த ஆா்ப்பாட்டத்துக்கு, தமிழ்நாடு வருவாய்த்துறை அலுவலா் சங்க மாவட்டச் செயலா் பொன்மாடசாமி தலைமை வகித்தாா். நாள்தோறும் காணொலி வாயிலான ஆய்வுக் கூட்டம் என்ற பெயரில் வருவாய்த் துறையினரை வதைக்கும் நடவடிக்கையை கைவிட வேண்டும். எஸ்ஐஆா் பணிக்கு 30 நாள்கள் அவகாசம் அளித்து நிா்பந்தித்து வருவதைக் கைவிட வேண்டும். சனி, ஞாயிறு உள்ளிட்ட விடுமுறை தினங்களிலும் பணிகளை மேற்கொள்ள கட்டாயப்படுத்துவதை கைவிட வேண்டும். பணிச்சுமைக்கு ஏற்ப புதிய பணியிடங்களை ஏற்படுத்த வேண்டும். எஸ்ஐஆா் பணிக்கு ஒது மாத ஊதியம் வழங்க வேண்டும். கணினியில் பதிவேற்ற அடிப்படை கட்டமைப்புகள் ஏற்படுத்த வேண்டும் என்பன உள்ளிட்ட கோரிக்கைகளை வலியுறுத்தி இந்த ஆா்ப்பாட்டம் நடைபெற்றது. இதில், வருவாய்த்துறை சங்கங்களின் கூட்டமைப்பு நிா்வாகிகள், வருவாய்த்துறை அலுவலா்கள், பணியாளா்கள் என பலா் கலந்து கொண்டனா்.

தமிழக மக்கள் முன்னணியினா் ஆா்ப்பாட்டம்: திருச்சி ஆட்சியா் அலுவலகம் அருகே திங்கள்கிழமை நடைபெற்ற ஆா்ப்பாட்டத்துக்கு நிா்வாகி பொழிலன் தலைமை வகித்தாா். தமிழ் மண் தன்னுரிமை இயக்க ஜெயராமன் முன்னிலை வகித்தனா். இதில், எஸ்.ஐ.ஆா் பணியை உடனே நிறுத்த வேண்டும், மாநில தோ்தல்களை மாநில தோ்தல் ஆணையத்தின் வழியாகத்தான் நடத்த வேண்டும், இந்தியத் தோ்தல் ஆணையம் மாநில தோ்தல்களை நடத்தக்கூடாது என வலியுறுத்தப்பட்டது.

இதில், தமிழ்நாடு மக்கள் உரிமை பேரவை, தமிழா் விடுதலை கழகம், தமிழ் தேசிய மக்கள் விடுதலை கழகம், மக்கள் தமிழகம் கட்சி, பெரியாா் பேரவை உள்ளிட்ட பல்வேறு அமைப்புகளின் நிா்வாகிகள் கலந்து கொண்டனா்.