"அரியலூரில் சாலைகளை ஆக்கிரமித்து கடை வைத்தால் கடும் நடவடிக்கை'

அரியலூர் நகராட்சிப் பகுதிகளில் பொதுமக்களுக்கு இடையூறாக சாலைகளை ஆக்கிரமித்து கடை வைப்பவர்கள் மீது சட்டப்படி நடவடிக்கை மேற்கொள்ளப்படும் என மாவட்ட ஆட்சியர் எ. சரவணவேல்ராஜ் தெரிவித்துள்ளார்.

இதுகுறித்து அவர் வெளியிட்டுள்ள செய்திக் குறிப்பு:

அரியலூர் நகராட்சி பேருந்து நிலையம் மற்றும் நகராட்சி பகுதிகளில் உள்ள சாலைகளை ஆக்கிரமித்து வாகன ஓட்டிகள், பாதசாரிகள் மற்றும் பொதுமக்களுக்கு இடையூறாக இருந்த தள்ளுவண்டி மற்றும் தரைக்கடைகள் நகராட்சி நிர்வாகம் மற்றும் வருவாய்த் துறை மூலம் அகற்றப்பட்டது. இதைத் தொடர்ந்து, பொதுமக்கள் குறைதீர்க்கும் நாள் கூட்டத்தில் அரியலூர் நகராட்சி பகுதிகளில் தரைக்கடை வைத்துள்ளவர்கள் தங்களுக்கு தரைக்கடை வைக்க இடம் ஒதுக்கீடு செய்ய வேண்டும் என்று கோரிக்கை விடுத்தனர்.

சார் ஆட்சியர் சந்திரசேகர்சாகமூரி, வட்டாட்சியர் திருமாறன், நகராட்சி ஆணையர் (பொ) ரவிச்சந்திரன் ஆகியோர் அரியலூர் நகராட்சி பேருந்து நிலையம் அருகே காலியிடத்தில் தள்ளுவண்டி மற்றும் தரைக்கடைகள் வைக்க இடம் தேர்வுசெய்தனர்.

அதன்பேரில், மாவட்ட நிர்வாகத்தின் சார்பில், அந்த இடத்தில் தரைக்கடைகள் வைக்க சம்பந்தப்பட்டவர்கள் முன்னிலையில் குலுக்கல் முறையில், கடந்த 12 ஆம் தேதி மாவட்ட ஆட்சியர் அலுவலகத்தில் இடம் ஒதுக்கீடு செய்யப்பட்டுள்ளது. அதன்படி, அரியலூர் நகராட்சி பேருந்து நிலையத்தில் தினசரி சந்தை திங்கள்கிழமை (செப். 14) முதல் தொடங்கப்பட்டுள்ளது.

எனவே, இனி அரியலூர் நகராட்சி பகுதிகள், சாலைகளில் தள்ளுவண்டி மற்றும் தரைக்கடைகளை வேறு எந்த இடத்திலும் அமைக்கக் கூடாது. அவ்வாறு அமைத்தால், அந்த ஆக்கிரமிப்பு நகராட்சி நிர்வாகம், வருவாய்த் துறையினர், நெடுஞ்சாலைத் துறையினர் மற்றும் காவல் துறையினரால் உடனடியாக அகற்றப்படுவதுடன், பொருட்களும் பறிமுதல் செய்யப்படும்.