நல்லாம்பாளையத்தில் சுகாதாரம் குறித்த விழிப்புணர்வு முகாம்

செந்துறை அருகே உள்ள நல்லாம்பாளையம் ஊராட்சியில் தனிநபர் கழிப்பறையின் முக்கியத்துவம் பற்றிய விழிப்புணர்வு முகாம் வெள்ளிக்கிழமை நடைபெற்றது.

  மாவட்ட சுகாதாரத் துறை அதிகாரி திருமுருகன் தலைமை வகித்து தொடங்கி வைத்த முகாமில், சென்னை திருநங்கைகள் கலைக்குழுவினர் மற்றும் பெரம்பலூர் ரோவர் வேளாண் கல்லூரி மாணவிகள் கலந்து கொண்டு நாடகத்தின் மூலம் கழிப்பறையின் பயன்பாடு குறித்து விளக்கிக் கூறினர்.

  வேளாண் கல்லூரி மாணவி செல்விபாரதி, அரசின் மானியம் பெற்று தனிநபர் கழிப்பறை கட்டிக்கொள்ளும் திட்டத்தினை பயன்படுத்தி கழிப்பறையில்லா வீடுகள் அனைத்திலும் கழிப்பறைகளைக் கட்டிக்கொள்ள வேண்டும் என்றதோடு, மனிதக்கழிவுகளை மக்கச்செய்து விவசாயத்துக்கு பயன்படுத்தி அதிக மகசூல் பெறலாம் என்றார்.

  ஊராட்சி மன்றத் தலைவர் சிவகுமார் வரவேற்றார். முகாமில் வட்டார வளர்ச்சி அலுவலர்கள் பிரபாகர், சேகர், துணை வட்டார வளர்ச்சி அலுவலர் அன்பழகன் மற்றும் திரளான மக்கள் கலந்து கொண்டனர்.